Válggat 2017

Bargiidbellodagas orru oalát roassu dál. Ávjovári válgabiirre listonjunuš, Kåre Olli, dovdá beahtahallan ja rámida NSR go leamaš čielggas válgagiččus ja go lea sámegielat presideantaevttohas.

Johttisápmelaččaid Listtu vuosttaševttohas Berit Marie E. Eira ii vel illut ovdal go buot bohtosat čilget. Sis lea doaivva oažžut guokte áirasa Sámediggái.

Nordkalottfolket Toril Bakken Kåven geige bealggi go geahččá prognosaid.

Árja massá vuosttaš válgaprognosaid mielde 4,8 proseantta jienain. – Beahtahalan hirbmosit jus ná bissu, lohká Trond Einar Karlsen, Árjja nubbievttohas.

Guovddášbellodaga Nancy Porsanger Anti, guhte lea nubbievttohas stuorradigge- ja sámediggeválgii, lea duhtavaš go Guovddášbellodat oažžu ovtta áirasa Stuorradiggái.

Guovdageainnu dáloniid searvvi Isak Mathis O. Hætta jáhkká oažžut áirasa Sámediggái, vaikke dássážii eai leat ožžon go 0,8 proseantta jienain. Prognosat čájehit ahte ii leat vuos áirras Guovdageainnu dáloniid searvái. – Jáhkán go buot Guovdageainnu jienaid leat lohkan, de lea áirras siste, lohká Hætta.

NSR presideanta ii duostta vuos illudit, muhto mieđiha ahte sis leat buorit prognosat mat dán rádjái leat boahtán.

Bargiidbellodaga presideantaevttohas ii leat duhtavaš gaskaboddosaš válgabohtosiiguin.

Vibeke Larsena ođđa bellodat oaččui 1,7 proseantta jienain, dain vuosttaš bohtosiin. Larsen ii dieđe beassá go šat Sámediggái, muhto doallá ain movtta badjin.

Son ii vuollánan go ii beassan iežas suohkanis jienastit, nu ahte son vujii 262 kilomehtera ránnjá gildii ja jienastii.

Siiddut