Dovdá go Sandra Borch iežas sápme­lažžan?

Gean livččii Sandra Borch válljen iežas olgeš giehtan? Mii leat finadan festiválabáikkis gos mii leat humadan nuorra politihkkáriin Sandra Borchain. Dál beasat don ge oahpásmuvvat sutnje.

 

14:30 Suoidnemánu 20. beaivi 2017
Ođastuvvon: 21.07.2017 - 13:44

Jus Sandra Borch livččii beassan stivret máilmmi, de livččii iežas ádjá válljen alcces olgešgiehtan. Ávdin sullui livččii dorvvastan Guovddášbellodaga presideantaevttohassii Cecilie Hansenii.

Ságat gal vulge ja reaškkaš maid skájai go journalisttat Anne Marie Hætta ja Sárá Máret Rávdná Oskal deaivvadeigga politihkkárkandidáhtain Sandra Borchain festiválabáikkis Olmmáivákkis.

Borch lea okta máŋgga nuorra politihkkárkandidáhtain geaiguin beassat oahpásmuvvat dán geasi.


OVTTASBARGU: NRK Sápmi ja Ávvir leaba ásahan doaimmahuslaš ovttasbarggu gos earret eará nuorra journalisttat jearahit nuorra politihkkárkandidáhtaid. Ulbmil lea jienasteddjiid oahpásmahttit kandidáhtaide geat čavčča rájes sáhttet leat mielde váikkuheames sámepolitihka ovddasguvlui. GOVVEN: ANNE RANDI SOLBAKKEN / NRK 

Olmmái fuomášuhtii ahte lea sápmelaš

Mii háliidit oahpásmuvvat Guovddášbellodaga Sandra Borchain. Lea vuosttaš geardde go Borch lea kandidáhttan Sámediggeválggaide ja Stuorradiggeválggaide.

Ieš jáhkká alddis buoret vejolašvuođa beassat Stuorradiggeáirrasin go beassat Sámediggeáirrasin.

Soames jagit leat gollán das rájes go Sandra olmmái lei guorahallamin iežas sohkahistorjjá. Son dat lei fuomášan ahte soai Sandrain leigga fulkkežagat ja nu beasai Sandra diehtit ahte su máttut ledje sápmelaččat.

Sámevuođa ja gullevašvuođas ii lean sáhka Sandra ruovttus.

 

Gullevašvuohta sámivuhtii

Sandra Borch lea bajásšaddan sámi suohkanis Loabágis muhto fertii olahit ollesolbmo agi ovdalgo beasai diehtit ahte lea sápmelaš.

Son atná vahágin go dáruiduhttin ja dan bahča árbi lea dagahan ahte son ja ollugat earát ge eai leat beassan bajásšaddat sámi kultuvrrain ja gielain.

Son muitala iežas dovdat gullevašvuođa sámi kultuvrii ja dovdá iežas sápmelažžan.

 

Váibmoáššit

– Livččen baicca válljen oahppat sámegiela ovdaliigo ođđadárogiela jus livččen beassat válljet!

Sandra lea čielga oaivil go jearrat sus makkár áššiid livččii vuoruhan jus livččii beassan stivret Sámedikki ihttin.

Giella ja oahpahusáššit leat ge Sandra váibmoáššit maid háliida ovddidit jus beassá mielde hábmet sámepolitihkka ovddasguvlui. Son livččii juolludan eanet ruđa oahpahusáššiide vai nannešii giellaoahpu.

(Ášši joatká gova vuolábealde)


DEAIVVADEDJE: NRK Sámi reportár Anne Marie Hætta ja Ávvira reportár Sárá Máret Rávdná Oskal humádeamen nuorra politihkkáriin Sandra Borchain. GOVVEN: ANNE RANDI SOLBAKKEN/NRK

Eallit ja luondu

Go Sandra áigu vuoiŋŋastit, de máhccá ruoktot Loabágii ja áinnas bartii gos de oaggu ja návddaša Davvi-Norgga geasi.

Son lea bajásšaddan oapmedálus ja nu lea elliin lunddolaš sadji su váimmus. Luondu lea maid hui dehálaš sutnje.

 

Ávžžuha dieđihit jienastuslohkui

Čájehuvvui ahte Sandra Borch lea sámi sogalaš. Nu badjánii sus ge dovdu ahte son lea sápmelaš ja nu válljii ge vihtta jagi áigi čálihit iežas Sámedikki jienastuslohkui.

Dál lea son goalmmádin Gáissi válgabires. 

Son ávžžuha nuoraid sihke jienastit ja jienastanlihppus merket nuorra evttohasaid nu ahte sii beasašedje badjeleppui buot listtuin.

Dál ávžžuha buohkaid geat dovdet sámi gullevašvuođa iežaset dieđihit jienastuslohkui.

På forsiden nå