Arctic Race of Norway preassagovva

Arctic Race buvttii lassitietnasa

Arctic Race sihkkelgilvu lea golli veara norgalaš ealáhusaide go luvvii báikegotti ja turisttain ruđa go oste sihke gálvvuid ja bálvalusaid.

15:27 Cuoŋománu 19. beaivi 2017

Bedriftskompetanse fitnodat lea dutkan ja čállán raportta Arctic Race sihkkelgilvu váikkuha Davvi-Norgga ealáhusaide, čállá Arctic Race preassadieđáhusas.

 

14 proseantta eambbo go 2014:s

Norgga stuorámus sihkkelgilvu, Arctic Race, lasihii diibmá 2016s norgalaš ealáhusaide 93 millijuvnna kruvnna tietnasa. Dát lea 14 proseantta eambbo go ovddit kártemis jagi 2014.

Dát luvvii ruđaid sihke báikkálaš olbmuin ja turisttain go oste gálvvuid ja bálvalusaid.

Gávppašeapmi ja čađaheapmi Arctic Race sihkkelgilvui ja Norway 2016 ja dasa lassin olbmuid oassálastin doalus, buvttii norgalaš ealáhusaide 93 miljovnna kruvnna lassitietnasa, mii lea 11,6 miljovnna kruvnna eambbo go 2014s.

 

Iskamat sihke ovdal ja maŋŋil

Bedriftskompetanse fitnodaga raporta vuođđu lea iskamat ovdal, dan botta ja maŋŋá diimmá borgemánu doaluid ja sii leat kárten makkár ruđalaš váikkuhusat, guovllu ovttasbargu, gealbolokten, gearggusvuohta, mediačállin ja olbmuid beroštupmi leamaš dán njealját Arctic Race doaluid čađaheapmái.

Oktiibuot osttii Arctic Race gálvvuid ja bálvalusaid Davvi-Norggas 15 miljovnna kruvnna ovddas ja Mátta-Norggas birrasii 10 miljovnna kruvnna ovddas.

 

Geahččit guđđe 54 miljovnna

Eanaš lassitietnasis boahtá gehččiin, eanaš olbmuin geat bohte doaluide.

Oktiibuot lea árvvoštallan ahte birrasii 180 000 olbmo leat čuvvon gilvvu, 33 000 bohte báikái ja guđđe 54 miljovnna kruvnna.

– Eai nu olusat ádde man dehálaš Arctic Race of Norway sihkkelgilvu lea ealáhussii ja turismaealáhussii. Dákkár gilvu váikkuha báikkiide, guovllude ja riikadássásaččat, ja dan leat mii vásihan dán Arctic Races njealje sihkkelgilvvus maid mii leat lágidan, lohká Arctic Race beaivválaš jođiheaddji Knut-Eirik Dybdal.

Fáddásánit
Valáštallan

På forsiden nå