VUJII BOASTUT: Ii ovttasge lean šat jáhkku ahte Elisabeth Edland sáhttá vuoitit maŋŋel go vujii guokte miilla boastut. Govven: Ida Sivertsen

Vujii boastut, muhto vuittii aŋkke

Eatnasat vissa doivo ahte suopmelaš Ronny Wingren vuoitá FL-500 go vulggii Skuvvánváris 34 minuhta ovdal earáid. 58-jahkásaš Nannestad áhkus gal ledje eará plánat.

09:36 Njukčamánu 14. beaivi 2017

Gilvaleaddjit masse jáhku Elisabeth Edlandii maŋŋel go árrat gilvvus vujii measta guokte miilla boastut FL-500 luohkás.

Maŋemus 108 kilomehtera Álttá guvlui son aŋkke manai buohkaid meattá.

Joatkas lei juo Elisabeth Edland (58) mannan suopmelačča Ronny Wingren meattá.

Maŋemus miillaid Álttá guvlui son guđii vel suopmelačča 20 minuhtain, čállá Finnmarksløpet preassadieđáhusastis.
 

Garra dálki

Porsáŋggus Áltái ii lean leaika.

Lei garra biegga váris, ja hui suhkkes borga, mii dagahii ahte Ronny Wingren šattai boltut luotta.

Dát lei buorrin Edlandii, muhto ii lean gal leaika sutnje ge.

– Lei váttis oaidnit, ja fertejin dárkilit geahččat ovdal go oidnen dihkáid. Ledjen hui ilus go fuomášin Ronny sealggi, in dušše danne go joksen su, muhto go oidnen oahpes olbmo, dadjá Edland maŋŋel go mollii ollii.

 

Nubbin
20 minuhta maŋŋel ollii Wingren maid mollii.

Son lei hui duhtavaš iežas nuppiin sajiin, vaikko bázii Nannestad áhkus daid maŋemus miillaid.

– Elisabeth gal ferte vuodjit guokte diimmu boastut boahtte jagi, iige dušše beannot diimmu, nu go dán jagi, boagustii Wingren.


Ronny Wingren ii skurdnján vaikko ii vuoitán.
Govven: Morten Broks

Norggameašttir
Elisabeth Edland ii vuoitán dušše FL-500, muhto son guoddá maid Norggameašttir nama 8-beanaráiddus, ja šelges gonagaspokála maid oažžu.

Ii leat guhká ovdal go Edlandas leat liikká olu medáljat go Alsgaardas ja Dæhlies.

Dá lea su njealját gonagaspokála.


ILUS: Elisabeth Edland lei hui duhtavaš go ollii mollii.
Govven: Elisabeth Bergquist

FL-1000

Dat vuosttaš FL-1000 gilvaleaddjit leat dál Báhčaveajis, Ruošša rájis.

Sin mátki lea vel birrasii 60 miilla ovdal go leat moalas Álttás.

Vuosttaža vurdet mollii bearjadaga.
 

 

På forsiden nå