FINNMARKSLØPET 2017: Ihttin lea vuolgga dán jagáš beanagilvvuin. Lágideaddjit ja beanavuoddjit sávvet militearahárjehallan ii šatta hástalussan sidjiide. Govven: Finnmarksløpet

Ii áiggošii tanksa deaivat láhttus

Ihttin álget Finnmarksløpet beanagilvvut Álttás. Vuoddji, Arne Karlstrøm sávva ahte militearahárjehallan «Joint Viking», ii šatta hástalussan sidjiide.

10:41 Njukčamánu 10. beaivi 2017
Ođastuvvon: 11.03.2017 - 10:38

Lávvordaga lea vuolgga Finnmarksløpet beanavuddjiide Álttá guovddážis, ovdal go militearahárjehallan «Joint Viking» mii dál lea jođus Finnmárkkus, lea nohkan. Lágideaddjit eai bala dán šaddat hástalussan.

 

Buorre ovttasbargu

Finnmarksløpet beaivválaš jođiheaddji, Svanhild Pedersen muitala sis lea buorre gulahallan Suodjalusain, ii ge bala šaddat hástalussan gilvui.

– Sii leat veahá davvelis go mii, nu ahte jáhkán dat manná bures. Sávvat goit ahte ii šatta hástalussan beanavuddjiide, dadjá Pedersen.

 

Mannan bures dán rádjái

Arne Karlstrøm lea searvan 22 geardde Finnmarksløpii, ja lea nu gohčoduvvon veterána. Son muitala ahte dát militearahárjehallan maid leamaš ovdal oktanaga dáinna gilvvuin, iige leat sutnje ja beatnagiidda váikkuhan goasse.

– Sávan ahte dat ii šatta hástalussan midjiide dán jagi ge. Muhto lea dieđusge hui unohas jus tanksa lea rasttildan láhttu ja lea šaddan roggi dasa, gosa mii bártahuvvat. Dahje juo boahtá ovddal. Sávvamis manná bures, lohká Karlstrøm.

Fáddásánit
Valáštallan

På forsiden nå