GUOVDAGEAIDNU JA KÁRÁŠJOHKA FAS DEAIVVADIT: Guovdageainnu ja Kárášjoga 4. divišuvnna lunttat deaivvadedje Guovdageainnus giđđat. Govven: Sara Máret Ravdna Oskal

Duoddara čiekčamii­guin loahpahit

Odne lea «Kampen om vidda» spábbačiekčamat Kárášjogas, gos Guovdageainnu ja Kárášjoga 4. divišuvnna lunttat deaivvadit. Lea nuppes go deaivvadit dán jagi čiekčamiin ja maiddái maŋimuš čiekčamat.

11:38 Golggotmánu 01. beaivi 2016
Ođastuvvon: 01.10.2016 - 11:43

Odne lávvardaga, deaivvadit IL Nordlys ja Guovdageainnu IL lunttat Kárášjogas, Niitoguolbana goanstarássešilljus.

De šaddá ge fas duoddara garraseamos spábbačiekčan maid gánniha geahččat.

Giđđat sáddejuvvui Guovdageainnu ja Kárášjoga lunttaid čiekčan TV2 valáštallan kanálas, dalle šattai Guovdageaidnu duoddara searamus.

Dál besset ge fas Kárášjoga ja Guovdageainnu lunttat čájehit gii dán vuoro šaddá duoddara searamussan. 

 

Boađe geahččat

Dál lea maŋemuš čiekčamat ráiddus dán jagi Kárášjoga ja Guovdageainnu lunttain, ja de šaddá ge hirbmat miellagiddevaš oaidnit gii šaddá duoddara searamussan loahppa čiekčamiin.

Lunttat ávžžuhit olbmuid boahtit geahččat, go lohpidit hirbmat buori čiekčamiid.

 

– Álggiimet ja loahpahat

Guovdageainnu IL hárjeheaddji, Isak Ole Hætta, muitala ahte Guovdageainnu IL álggahii ráidočiekčamii IL Nordlys vuostá giđđat, ja dál fas čakčat galget loahpahit ráidočiekčamii sin vuostá.

Isak Ole Hætta ii loga hárjehallan čiekčamiidda eambbo go dábálaččat, go lea dábálaš čiekčamat.

– Muhto mis leat muhtin čiekčit geat eai leat mielde dan vuoro, geat leat mávssolaččat midjiide. Mii fertet oaidnit movt dássi lea šaddan dan rájes go mii maŋemuš deaivvadeimmet.

 

Garra čiekčan

Hætta lohká ahte diehttelas háliidit goappašat joavkkut vuoitit.

– Muhto mun sávan ahte mii čiekčat bures Nordlysa vuostá, nu go mii álot leat dahkan. Dat šaddet hirbmat garra čiekčamat. Ferte oaidnit čiekčanbeaivvi, makkár mokta lunttain lea, loahpaha Hætta.

 

Buorre ráhkkaneapmi

IL Nordlys hárjeheaddji, Rasmus Somby, lohká ahte sii leat bures hárjehallan daiguin čiekčamiin mat dál leat leamašan.

– Mis leat aitto leamašan čiekčamat, ja dat lea buorre ráhkkaneapmi dáid čiekčamiidda.

Somby lohká iežas doaivut čiekčamiid šaddat hui gelddolažžan.

Ja go guokte sámejoavkku deaivvadit, dán lohká hui somán:

– Muhto ferte oaidnit go de duopmár bosáda, gii de vuoitá.

På forsiden nå