VUOITI: Dievdduidluohká vuoiti Stein Joks goargŋumin Sávkadassii. Govven: Petter Grønmo (Preassagovva)

Vuittii ja bijai ođđa olahusa

Deatnulaš Stein Joks vuittii dán jagáš Savkadasrittet ja časkkii diimmá olahusa 13 minuhtain.

15:29 Borgemánu 31. beaivi 2015
Ođastuvvon: 01.09.2015 - 10:35

Svein Joks sihkkelastináigi lei 1.51.51 ja časkkii ge diimmá vuoiti láhttoolahusa 13 minuhtain. Láhttoolahusa bijai Jørn Engstad diibmá go duolmmastii dan 36 kilomehtera Kárášjogas Váljohkii áiggis 2.04,48.

Nubbin bođii Per Torleiv Ravna ja Anders Boine Verstad fas goalmmádin - son maid vuittii 17 - 19 luohká. Nuoramus oasálasti lei kárášjohkalaš Mathias Paltto gii časkkii máŋga hárjánan sihkkelastiid. Dán muitala Kárášjoga sihkkelsearvvi jođiheaddji, Osvald Grønmo.

 

Buoridii iežas olahusa

Nordlysbyen syhkkelsearvvi Joril Vedhugnes vuittii fas nissonjoavkku, ja son buoridii iežas láhttoolahusa maid 2013:s bijai 15 minuhtain. Deatnulaš Martine Arntzen Joks vuittii nissoniid 17 - 19 luohká.

 

14 lášmmohalli

Savkadasrittetii sáhttá searvat juoga gilvoluohkkái dahje lášmmohallanluohkkái. 14:s válljejedje ge dán jagi searvat lášmmohallanluohkkái.

– Máđii lei goikkis ja lei buoret go ovddit jagiid. Oaseváldit ledje duhtavačča sihke mađiijain, biepmuiguin ja muđui lágidemiin, muitala Grønmo.

 

På forsiden nå