Norgga duopmostuollu dieđihii disdaga ahte Greenpeace ja Luonddu ja Nuoraid váidda stáda vuostá dohkkehuvvo. Sii leat váidán stáda go dohkkehit ođđa oljobohkamiid árktalaš guovlluin.
Norgga duopmostuollu dieđihii disdaga ahte Greenpeace ja Luonddu ja Nuoraid váidda stáda vuostá dohkkehuvvo. Sii leat váidán stáda go dohkkehit ođđa oljobohkamiid árktalaš guovlluin.
Lea vuosttaš geardde go Norgga vuođđolága paragráfa 112 geahččaluvvo dikkis, mas celko ahte eiseválddit galget gáhttet luonddu ja birrasa boahttevaš buolvvaide.
Áigot Norgga oažžut váldit ovddasvástádusa
Diggi álggahuvvo skábmamánu 13. beaivvi ja lea biddjon guokte vahkku diggái.
– Dát diggeášši lea oažžun dihte Norgga stáda čájehit ovddasvástádusa olbmuid sihkarvuhtii ja dearvvašvuhtii, maid Norgga stáhta risikere go dohkkeha eambbo oljobohkamiid árktalaš guovlluin. Go fossiila boaldámušaid vižžet hearkkes guovlluin, de eai leat čuovvume dálkkádatšiehtadusa mii dahkkui Parisas, ja Norgga iežas oaivila, dadjá Ruoŧa Greenpeace jođiheaddji Frode Pleym preassadieđáhusas.
Eai hálit árktalaš guvlui bohkamiid
Norgga stáhta lea vuosttaš geardde 20 jahkái dohkkehan ođđa oljobohkanguovllu Barentsmearas. Fitnodagain, mat leat ožžon bohkanlobi, lea earret eará Ruoŧa Lundin Petroleum, mas galgá leat davimus oljobohkandoaibma máilmmis. Sii galget bohkat viđa guovllus dan logi guovllus mat leat.
– Lundin Petroleum lea dakkár fitnodat man mii eat hálit árktalaš guovlluide, go sii leat čájehan ahte eai čájet makkárge ovddasvástádusa, lohká Pleym.
Fitnodagat geat leat ožžon bohkanlobi
Earát geat leat ožžon bohkanlobi Barentsábis lea Statoil (Norga), Capricorn and Centrica (Stuorabritania), Chevron and ConocoPhillips (USA), DEA (Duiska), Aker BP (Norga), Idemitsu (Japána), LUKOIL (Ruošša), Lundin Petroleum (Ruoŧŧa), OMV (Østerriika), PGNiG (Norga/ Polen), Tullow (Stuorabritania / Afrihkká).