-Almmuhus-
-Almmuhus-
-Almmuhus-
OĐĐASATStatnett beassá bákkus lonistit eatnamiid

Statnett beassá bákkus lonistit eatnamiid

-

-

Boazodoalu vuosteháhku ii vuhtiiváldojuvvon. Álttá nammamánni atti Statnettii lobi bákkus lonistit boazodoalo eatnamiid ja vuoigatvuođaid, vai sáhttet hukset el-fápmolinnjá

Birrasiid guovtte vahku áigi deaivvadedje orohagat ja Statnett Álttá nammamánne ovddas. Statnett dat lei stevdnen Fálesnuori, Fieddara, Válgenjárgga ja Lákkonjárgga.

Dát orohagat eai lean vuollánan vuolláičállit šiehtadusa Statnettain ođđa el-fápmolinnjá huksema birra. Linnjá galgá huksejuvvot Skáiddi ja Báhccavuona gaskkal.

 

Behtohallan

Nammamánne lea dál meannudan ášši ja cealká ahte Statnett oažžu bákkus lonistit osiid dáid orohagaid eatnamiin ja vuoigatvuođain, čállá NRK Sápmi.

Lákkonjárgga boazodoalli Hans Ole Eira ovddastii Lákkonjárgga Nammamánnerievttis, son lohká NRK:i ahte diehttelasat leat behtohallan go nie mearridii Nammamánne.

– Ferten deattuhat ahte mii eat váidalan Nammamánnái bissehan dihte huksema, mii háliideimmet vuosttaldit bággolonisteami, dan ahte min vuoigatvuođat addojit Statnettii, lohká Eira.

 

Loga maid: – Hukset liikká

 

Eai lean álggus váidán

Boazodoallu lea ovdal váidalan dán huksema Oljo- ja energiijadepartementtii, ja go meannudedje váidaga cuoŋománu 2015:s, de čujuhii departemeantta earret eará dasa ahte «mearrádusa ii sáhte váidit».

– Danne min orohat ii šat váidán ášši. Maŋit áiggis leat ráŋggáštuvvon dan ovddas, go eat leat bovdejuvvon konsultašuvnnaide go eat lean váidán, muitala Eira.

 

Statnett lei stevdnemis Nammamánnii, gáibidan ahte orohagat galge ieža gokčat áššegoluid, mat gárte leat 15 duhát ruvnno. Nammamánne hilggui dien oasi, ii ge guhtege bealli dárbbaš máksit áššegoluid.

-Almmuhus-