Guhkida vuodjinlobi dán korona-áiggis
Stáhta geaidnodoaimmat guhkida vuodjinlobi daid vuddjiide geat livčče galgan ođasmahttit vuodjinlobiid dáid áiggid. Dat gusto stuorát lossabiilavuoddjiide, ámmátvuoddjiide, heahtevuoddjiide ja 80-jahkásaččaide.
Stáhta geaidnodoaimmahat dieđiha preassadieđáhusa bokte ahte sii leat ovttasráđiid Dearvvašvuođadirektoráhtain mearridan gaskaboddosaš guhkiduvvon vuodjinlobi lossabiilavuoddjiide, ámmátvuoddjiide, heahtevuojánvuoddjiide. Dát ámmátjoavkkut sáhttet ain korona-áiggiid gaskaboddosaččat vuodjit guhtta mánu guhkit go mearriduvvon maŋimuš beaivi, jus fal muđuid devdet dearvvašvuođagáibádusaid.
Badjel 80 -jahkásaččat geain lea vuodjinkoarta ožžot vuoigatvuođa vuodjit golbma mánu guhkit go mearriduvvon maŋimuš beaivi, jus fal muđuid devdet dearvvašvuođagáibádusaid.
– Dát guoská dušše Norgii ja dušše sidjiide geat eai leat ožžon makkárge gáržžidemiid dearvvašvuođa hástalusaid ektui ovdalis, lohká Stáhta geaidnodoaimmahaga johtolatossodaga ossodatdirektevra Henning Harsem.
Jus áigu guhkidit busse ja guorbmebiilla, ámmátvuodjingelbbolašvuođa dahje heahtevuojánvuoddjigelbbolašvuođa vuodjinlobi, de gáibiduvvo dearvvašvuođaduođaštus. Dábálaččat jus dat lea ortnegis, de bistá dábálaš vuodjinvuoigatvuohta vihtta jagi. Lea maid dearvvašvuođagáibádus ođasmahttit vuodjinvuoigatvuođa olbmuide geat devdet 80 jagi. Jus dárbbašat eambbo dieđu, gulahala Stáhta geaidnodoaimmahagain.
