Stáda geaidnodoaimmahat gidde buot bálvalusaid cuoŋománu 25. beaivvis gitta 28. beaivái mat gusket vuojániidda. Máŋga johtolatstašuvnna leat maid dalle gitta.
Stáda geaidnodoaimmahat lea ráhkadeame ođđa mohtorvuojánregistara.
Dieđut 11 miljovnna vuojána birra galget sirdot boares vuogádagas ođđa vuogádahkii.
Dat guoská ja čuohcá johtolatstašuvnnas ja vegvesen.no siiddu geavaheddjiide.
– Mis leat 19 johtolatstašuvnna Davvi-Norggas. Muhtun stašuvnnat leat áibbas gitta go sirdit ođđa vuogádahkii. Earát dollet rabas, muhto fállet dušše vuodjinkoartabálvalusa. De ii sáhte oastit geahččalanšilttaid, buktit vuovdindieđáhusa, máksit vuojánregistrerema, čađahit vuojándieđiheami dahje sihkkut vuojána registaris juste daid beivviid, lohká Stáda geaidnodoaimmahaga ossodatdirektevra Jørn Simonsen preassadieđáhusas.
Go ođđa vuogádat lea sajis, de ii sáhte šat máksit ođđasisdieđihandivada johtolatstašuvnnas, ja fertet maid duođaštit gii don leat go dieđihat fievrru vuovdima.
Geaidnodoaimmahaga neahttasiiddus gávdná eanet dieđuid movt čađahit bálvalusaid jođánit, álkit ja dorvvolaččat, ovdalii go ieš mannat Stáda geainodoaimmahaga kantuvrii.
