Sámi suohkaniid sátnejođiheaddjit eai leat mielas oktiičaskimii Romssa ja Finnmárkku fylkkaid okta regiovdnan, earret eará danne go lea ballu lahppot stuora regiovdnii ja ahte ožžot unnit váikkuhanvejolašvuođaid.
Sámi suohkaniid sátnejođiheaddjit eai leat mielas oktiičaskimii Romssa ja Finnmárkku fylkkaid okta regiovdnan, earret eará danne go lea ballu lahppot stuora regiovdnii ja ahte ožžot unnit váikkuhanvejolašvuođaid.
Guovdageainnu suohkana sátnejođiheaddji Johan Vasara (Bb) ballá ahte lea vuosttaš lávki hávkadeames smávit báikkiid.
– Dákkár ovttastemiid luondu, ii dárbbaš leat dihtomielalaš politihkka, lea ahte smávit báikkit vuoittáhallet. Dan oaidnit ránnjáriikkain gos leat čađahan dákkár ovttastahttimiid. Regiovdnaguovddážat gáidet dobbeliidda, ja dat mat ovdal ledje regiovdnaguovddážat, nu movt Álttá, Girkonjárga ja Hámmárfeasta, gártet boaittobealguovlun. Ii dárbbaš leahkit daidda báikkiide heittot, muhto mii ja láhppot, geat leat olmmošlogu dáfus unnit, lohká son.
Geavvat doaresbeallai
Kárášjoga gieldda sátnejođiheaddji Svein Atle Somby (Bb) ii loga buorren go šaddá vel stuorát fylkka mii ovttalaččas lea juo hui viiddis.
– Mun smiehtan mii leat juo doares bealde ja šaddat eambbo ain doaresbeallái dan stuora servvodaga. Šaddá nu stuorisin, ja sáhttá šaddat guhkkibun ja losibun gulahallat go lea nu guhkkin. Das lea ollu mii lea ain eahpesihkar, nu movt vuoigatvuođaid ektui, ja movt stuorit álbmot váikkuha ealáhusaide, lohká Somby.
Ii leat válmmas
Gáivuona suohkana sátnejođiheaddji Svein O. Leiros (Gb) lohká regiovdnareforpmas, nu movt lea dál, leat stuora váilevašvuođat ii ge leat válmmas.
– Das váilu sisdoallu ja movt barggut galget juogaduvvot regiovnnas. Doppe leat nu ollu vástitkeahttá gažaldagat, nu movt Finnmárkkuopmodat, ja vástádus dasa galgá leahkit oktiičaskot. Go oaidná ahte Finnmárkkus eai hálit oktiičaskima, de lea dát bággooktiičaskin, ja dasa in leat mielas, lohká son.
– Gielda- ja ođasmahttinministtar lea dadjan ahte regiovdnareforbma ii galgga meannuduvvot Stuoradikkis ovdal go boahtte jagi. Dan ahte dál leat šiehttan ja ovttaoaivilii šaddan, ja leat guođđán Rogalándda sierra fylkan ja Møre ja Romsdal sierra, ja davvin časket oktii, de lea dát mu mielas rájiiguin stoahkame, lohká Leiros.
Leiros lohká sin bellodat lea vuostá regiovdnareforpma ja áigot bargat dan guvlui ahte olles dat reforbma máhcahuvvo.
Politihkalaš deaddu sirdo gávpogii
Deanu gieldda sátnejođiheaddji Frank Ingilæ (Bb) lohká váikkuhus sin gildii lea ahte šaddat guhkit gaskka gos mearrádusat galget dahkkot,ja sii ožžot unnit váikkuhusvejolašvuođa.
– Fylkkagielddas leat ollu doaimmat Deanu gielddas, ja mis leat várra eanemus kilomehteriid fylkkageaidnu, ja guhkes geainnut maid leat ollu jagiid divodan doarjagiin fylkkagielddas. Dat šaddá váddásit ovtta stuorit regiovnnas, gos šaddat gilvalit ollu eambbosiiguin daid ráddjejuvvon ruđaid alde, go politihkalaš deaddu boahtá oba sihkkarit sirdašuvvot Romsii ja erenoamážit Romssa gávpogii, lohká Ingilæ. Son ii oainne maidege buriid regiovdnareforbmas nu movt dál lea, ja lea áibbas vuostá ja jáhkká ollus Finnmárkkus leat vuosttá oktiičaskima.
Unohas vuohki
Porsáŋggu sátnejođiheaddji Aina Borch (Bb) mielas lea vuohki movt oktiičaskon lea dáhkkon issoras unohas ráđđehusbellodagaid bealis.
– Ikte lei gulaskuddan áššis, ja otne bohtet dáinna mearrádus, ja mu mielas lea dat hui ártegis čađahanvuohki. Mus lea vel buorrin gullat ákkastallama regiovdnareforbmas dan guvlui ahte galgat oažžut buoret bálvalusaid, eanet bargosajiid ja ahte mii galggašeimmet šaddat eanet geasuheaddji časkot oktii. Váillahan sisdoalu, ja báikkálaš demokratiija návccahuvva, danne go fápmu guovdduštuvvo ja guovlu geahnohuvvá.
