Sámi suohkanat ávžžu­huvvojit ásai­duhttit 435 báhta­readdji

Integrerings- og mangfoldsdirektoratet (IMDi) ávžžuha Norgga suohkaniid ásaiduhttit 37 000 báhtareaddji boahtte jagi. Sámi suohkanat galggaše váldit vuostá 435 báhtareaddji. 

Soahti Ukrainas joatkašuvvá ja máŋga miljovnna olbmo leat báhtaran. Norgga eiseválddit dáhttot suohkaniid ráhkkanit ásaiduhttit 37 000 báhtareaddji boahtte jagi. Ná olu báhtareddjiid ii leat Norga ovdal váldán vuostá. 

– Suohkanat leat dahkan erenomáš buori barggu, ja mii joatkit čájehit solidaritehta ja váldit oasi iežamet ovddasvástádusas báhtareddjiid ektui. Danin lea dárbu ahte suohkanat ain ásaiduhttet báhtareddjiid. Mii oaidnit ahte dát hástala sihke suohkaniid ja almmolaš eiseválddiid kapasitehta ja bálvalusaid. Go dál plánet goalmmát jagi ásaiduhttit eanet báhtareddjiid go goassege ovdal, de gáibida dat vel eanet searvevuođas, lohká bargo- ja searvadahttinministtar Tonje Brenna preassadieđáhusas.  

Dan rájes go Ruošša fallehii Ukraina, de leat Norgga suohkanat ásaiduhttán badjel 57 000 báhtareaddji. Birrasii 50 000 dáin leat báhtaran Ukrainas. Maŋimuš mánuid leat boahtán birrasii 1000 ukrainalačča vahkkosaččat. 

– Olu báhtareaddjit váikkuhit vuostáiváldinvuogádahkii ja ásaiduhttimii. Danin lea ráđđehus čađahan doaibmabijuid ja heivehemiid vai nákcet gieđahallat dilálašvuođa. Mii čuovvut ain mielde ja árvvoštallat lea go dárbu vel eanet doaibmabijuid ásahit, lohká Brenna.