Nils Rune Utsi lea dovdoseamos iežas musihkain, go son lea ráppár. Musihkka ii leat áidna attáldat mii Nils Runes lea, go čakčat son lea goalmmes lávkeme teáhterlávdái.
Nils Rune Utsi lea dovdoseamos iežas musihkain, go son lea ráppár. Musihkka ii leat áidna attáldat mii Nils Runes lea, go čakčat son lea goalmmes lávkeme teáhterlávdái.
Sámi ráppár Nils Rune Utsi dahje SlinCraze, hálddaša ollu iešguđetlágan guoimmuhansurggiid. Son lea dovddus ráppár, muhto lea maid finadan teáhterlávddis. Son lea leamaš guovtti Beaivváš Sámi Našunálateáhtera bihtás mielde, ja dál son galgá neaktit «Plupp» nammasaš čájálmasas, Åarjelhsamien Teateres.
– Illudan hui ollu bargagoahtit Åarjelhsamien Teaterein, ja lea vuosttaš háve go mun ovttasbarggan singuin. Seammás beasan oahpásnuvvat eambbo lullisámegielain, sávvamis beasan oahppat veaháš, ja soaittán vel lávddis geahččalit hupmat lullisámegiela, muitala Nils Rune Utsi.
Mánáid teáhter
«Plupp» lea čájálmas mii lea ráhkaduvvon mánáide, go lea ráhkaduvvon Inga Borg Plupp girjjiid vuođul. Plupp orru meahcis, Alitjávregáttis. Sus leat alit bolfevuovttat, ja su čeabetliidni libarda biekkas. Nils Rune Utsi galgá neaktit Pluppe buoremus olbmá, Slámma. Son lea goddesáhpán, ja ovttas Pluppiin ja buoidagiin Tjeksein, sii vánddardit mehciid ja gávdnet olu hástalusaid ja maiddái ođđa olbmáid.
– Šaddá hui somá neaktit dakkár bihtás mii lea eambbo heivejuvvon mánáide. De beassá veaháš eambbo suohtastallat, go dat bihtát main lean leamaš mielde ovdal leat leamaš hui sevdnjes bihtát, muitala Nils Rune Utsi.
Joikikála
Teáhterbihttá lea nu gohčoduvvon joikikála. Joikikála lea rievdadus musikálas, mii lea lávlun- ja musihkkateáhter. Joikikála lea ges juoiganteáhter.
Nils Rune bohkosa go Ávvir jearrá galgá go juoigat lávddis, ja son čilge ahte son ii dieđe vuos nu sihkkarit movt dat šaddá.
– Mun dieđán ahte ráppet gal galggan, in dieđe luođi vel, muhto hui sihkkarit galgá dat maid! Mun in láve gal juoigat, muhto muhtun iežan lávlagiin juoiggan veaháš.
– Issoras teáhterlávddis
Nils Rune lea dovdoseamos iežas musihkain, mii lea sámi ráppa, muhto lea maid hárjánan neavttár. Son čilge ahte son lea eambbo sihkar musihkkalávddis, go de son lávlu iežas lávlagiid, maid ieš lea čállán.
– Teáhteris lea eambbo issoras, go mun in leat neavttár. Teáhteris ferten gullat maid bagadalli dadjá, ja dasa lassin geahččalit neaktit, mii ii leat álo nu álki. Musihkas dieđán ieš movt galggan, go leat mu iežan materiálat, ja doppe dovddan iežan.
Vuosttaščájálmas lea Muoffies golggotmánu loahpas. Frode Fjellheim lea čájálmasa komponista, Cecilia Persson lea čállán mánusa ja Haukur Gunnarsson lea rešissevra. Elle Sofe Henriksen lea koreográfa, Jens Gustavson scenográfa ja Sara Kander lea hábmen biktasiid.
