-Almmuhus-
-Almmuhus-
-Almmuhus-
OĐĐASATSáme­digge­bušeahtta 2021 lea gárvvis: – Eanet­lohku nanne sámiid vuoigat­vuođaid

Sáme­digge­bušeahtta 2021 lea gárvvis: – Eanet­lohku nanne sámiid vuoigat­vuođaid

-

-

Lávdegottis leat dál eanetlogu bealis šaddan ovttaoaivilii sámediggebušeahta meannudemiin.

Norgga Sámedikki eanetlohku, mas leat Norgga Sámiid Riikkasearvi (NSR), Guovddášbellodat (GB, Johtti Sámiid Listu (JSL) ja Åarjel-Saemiej-Gïelh (ÅaSG), doarju Sámediggeráđi bušeahttaárvalusa ja vállje dasa lassin nannet muhtun guovddáš áigumušaid ovttain millijovnna ruvnnuin.

Nu čállet sii preassadieđáhusas. – Lassin daidda stuorra vuoruhemiide sámi oahpponeavvuide, giellabargguide ja museaide de mii nannet maiddái doarjjaortnega sámi riekteguddiide 450 000 ruvnnuin, dadjá NSR joavkojođiheaddji ja áššejođiheaddji, Runar Myrnes Balto.

– Lea stuorra vuordámuš ahte Sámediggi doarju go sámi bealit šaddet diggái mannat loktet prinsihpalaš áššiid mat guoskkahit min buohkaid, danne nannejuvvo dát ohcanvuđot doarjjaortnet 1,9 millijovnna ruvdnui, dadjá Myrnes Balto.

Guovddášbellodat duhtavaš go vuoruhit Saviomusea

Juolluduvvo 250 000 ovdaprošektii mii geahčada museahuksema sámi dáiddárii John Savioi, guhte lei Mátta-Várjjagis eret. Juolludeapmi addo merkejuvvon juolludeapmin Deanu ja Várjjat Museasiidii (DVM). Guovddášbellodaga joavkojođiheaddji, Cecilie Hansen, lea duhtavaš dainna áigumušain.

– Guovddášbellodat oaivvilda ahte dárbbašit Savio-musea Mátta-Várjjagii. Danne leat hui illosat go dál besset muitalit ahte juolludit ruđaid ovdaprošektii. Dát lea mielde bidjamin johtui dan mii sávvamis šaddá sierra Savio-musean muhtun jagiid geahčen, áinnas dakkár musea mas eanet doaimmat nu mo ovdamearkka dihtii sámi gávnnadanbáiki, dadjá Cecilie Hansen.

JSL duhtavaš go vuoruhit dásseárvvu

Ođđa bušeahttavuoruheapmi lea seminára nissoniid dásseárvvu birra boazodoalus, masa juolluduvvo 100 000. Lea maid mielde bušeahtas ahte «ruovttudoallu» (báikedoallu ja siidadoallu) leat dehálaččat bearašvuđot ealáhusas. Daiguin vuoruhemiiguin lea Johtti Sámiid Listu (JSL) erenoamáš duđavaš.

– Dásseárvu boazodoalus lea dehálaš, ja mii leat duđavaččat ahte Sámediggi boahtte jagi dáhttu lágidit seminára mas dat fáddá lea. Dat galggašii maid leat oassin sihke Sámedikki dásseárvodieđáhusa čuovvoleamis ja boazodoallolága reviderenbarggus, dadjá Berit Marie E. Eira, Johttiid Sámi Listtu joavkojođiheaddji.

Preassadieđáhusas čállo maid ahte JSL lea maid ilus das go bušeahtas celko ahte boazodoallit buot agiin ja dearvvašvuođadiliin leat seamma dehálaččat ealáhussii ja ahte sidjiide galgá sihkkarastojuvvot oasálastinvejolašvuohta ja gullevašvuohta.

ÅaSG ilus Sjieltie-doarjagiin

Dasa lassin de lea Sjeltie – Sámi Kulturpárka Maajehjaevries 100 000 ruvnnuin, mii dainna loktejuvvo 120 000 dán bušeahtas. Ellinor Marita Jåma Åarjel-Saemiej-Gïelhas lea erenoamáš ilus dáinna maŋimuš loktemiin.

– Mii ÅaSG:s leat illosat ahte vuoruhuvvojit sihke vuoigatvuođat ja Sjeltie. Leat olu birrasat Sámis ja Lulli-Sámis mat barget buori barggu, ja mii diehtit ahte leat stuorra dárbbut. Sjeltie, mas iešmearrideapmi lea máhcahuvvon dan dološ sámi báikkis Maajehjaevries, lea buorre ovdamearka das mo báikkálaš searat barget bures, ja mii leat illosat leat oassin eanetlogus Sámedikkis mii dáhttu nannet doarjaga sidjiide 100 000 ruvnnuin, dadjá Jåma.

Maŋimuš rievdadus man eanetlohku lea dahkan lea ásahit 100 000 ruvnno sturrosaš stipeandaortnega mii galgá movttiidahttit eanet sámegielat sisdoalu buvttadeapmái digitála vuogádagaide, nu mo YouTubeii, rávdnjemat dahje podkasttaide.

Vuoruheapmi

250 000 8.3.4 (15504) Deanu ja Várjjat museasiida – a) merkejuvvo Savio-musea ovdaprošektii

100 000 8.3.5 (15013) Sjeltie – Sámi kulturpárka

100 000 Ođđa vuoruheapmi 4.3.13: Stipeanda sámegielat digitálasisdoalu buvttadeapmái

100 000 Ođđa vuoruheapmi 7.2.1: Seminára, dásseárvu boazodoalus

450 000 6.2.3 Sámi areála- ja resursavuoigatvuođaid eará čuovvuleapmi – ohcanvuđot doarjagat

Vižžojuvvo

-600 000 15 Hálddahusdássi d) Geahpedeapmi ákkastallojuvvo unnit johtimiin 2020:s ja álggus 2021:s covid-19 dihtii.

-100 000 4.3.6 Giellaprošeavttat – ohcanvuđot doarjja

100 000 14.2 (1010) Sámedikki dievasčoahkkin a) Geahpedeapmi ákkastallojuvvo unnit johtimiin 2020:s ja álggus 2021:s covid-19 dihtii.

-100 000 14.2 (1111) Sámedikki fágalávdegottit a) Geahpedeapmi ákkastallojuvvo unnit johtimiin 2020:s ja álggus 2021:s covid-19 dihtii.

100 000 14.2 (15.10) Sámediggeráđđi a) Geahpedeapmi ákkastallojuvvo unnit johttimiin 2020:s ja álggus 2021:s covid-19 dihtii.

-Almmuhus-