-Almmuhus-
-Almmuhus-
-Almmuhus-
OĐĐASATRuvkedoaibma otná fáddán Sámedikkis

Ruvkedoaibma otná fáddán Sámedikkis

-

-

Odne maŋŋágaskabeaivvi lágida Sámedikki ealáhus- ja kulturlávdegoddi rabas gulaskuddama ruvkedoaibmaplánaid birra Nussirii ja Gumpenjunnái Sámedikkis Kárášjogas.

 

Lávdegotti jođiheaddji Mariann Wollmann Magga lohká duogáš rabas gulaskuddamii lea go ášši lea nu riidovuloš ja leat ollu iešguđet oaivilat ášši birra. Rabas gulaskuddamii leat dieđihuvvon boahtit Luonddunuorat, Fiettar orohat, Luonddugáhttenlihttu, Sámedikki nuoraidlávdegoddi ja Fálesnuorri gielda, ja buohkat lea ožžon ságastanáigi.

 – Mii sávvat ahte ollu dieđut ja oainnut ovdanbohtet odne. Lea vuosttaš ášši mas Sámedikkis leamašan intenšuvdnašiehtadus, nu lea hui dehálaš oažžut oainnuid ovdan. Mii Bargiidbellodagas sávvat ahte ollu bealit bohtet ovdan ovdal go ášši galgá meannuduvvot dievasčoahkkimis, lohká Wollmann Magga. Sámedikki dievasčoahkkin galgá duorastaga meannudit ášši.

 

Fálesnuori gielda boahtá

Fálesnuori sátnejođiheaddji Terje Wikstrøm lea hui duđavaš go Sámediggi lágida rabas gulaskuddama, son boahtá odne Kárášjohkii ráđđealbmáin ja muhtun ovdagoddeáirasáiguin.

 – Mii leat ožžon logi minuhta ovdanbuktit iežamet oainnu áššis. Mii doalahat gielddastivrra mearrádusa ahte leat mielas ásahit ruvkedoaimma gildii ja ahte ruvkebázahusaid luoitit Riehpovutnii. Mii maid deattuhit odne iežamet sáhkavuorus mearrasámiid oaiviliid mat jávket dán digaštallamis. Lea beare ollu deaddu boazodollui, muhto ferte muitit ahte boazodoallu lea oassi mearasámiid ássanguovllus Jáhkavuona gilis, mii lea seamma dehálaš dán digaštallamis go boazodoallu, lohká Fálesnuori sátnejođiheaddji ja lasiha ahte sii maiddái gažadit ráđi oainnu áššis, gos leat deattuhan ahte sámi kultuvra ja identitehta geahnohuvvá ruvkedoaimmaid dihte.

-Almmuhus-