Varas artihkal čájeha ahte Romssa universitehta skuvle doaktáriid Davvi-Norgii.
Varas artihkal čájeha ahte Romssa universitehta skuvle doaktáriid Davvi-Norgii.
Romsii álggahuvvui medisiidnaoahppu 70-logus, ja dalle lei mihttu oažžut eambbo doaktáriid Davvi-Norgii. Dalle lei stuora dárbu daidda.
Dál čájeha varas artihkal man seniordutki Margrethe Gaski lea čállán, ahte eanaš studeanttat geat gerget, álget bargui Davvi-Norgii.
– Bealli sis, geat Romssa universitehtas leat skuvlejuvvon, ledje barggus Davvi-Norggas, lohká Gaski Romssa universitehta preassadieđáhusas.
44 proseantta fástadoavttervirggiin
Su dutkama vuođđun ledje dat doaktárat geat gárvejedje oahpus gaskal 1979 ja 2012. Olles 1 611 doaktára geat ain ledje doavtterbarggus.
– 44 proseantta buot fástadoaktáriin Davvi-Norggas ledje skuvlejuvvon Romssa universitehtas. Lohku lei 5 proseantta muđui riikkas, lohká son.
Dasa lassin ledje Romssa universitehta doaktárat 34 proseantta buot fástadoavttervirggiin boaittobeale suohkaniin Davvi-Norggas. Guovddáš suohkaniin lei lohku arvat stuorát, 84 proseantta.
– Turnusdoaktárat eai lean oassin dán iskosis, go sin bargosadji lea gaskaboddosaš, čilge Gaski.
Háliidit eambbo doaktáriid Finnmárkui
Gaski artihkal čájeha ahte unnit oassi Finnmárkku Buohcciviesu bargiin leat oahpu gazzan Romssa universitehtas.
Sihkkarastin dihte ahte guovtti davimus fylkkas lassánit doaktárat, de leat Finnmárkui álggahan oahppofálaldaga. Doavtterstudeanttat sáhttet vázzit dan guokte maŋemuš jagi doppe.
– Dat mii dás lea buorre lea «luossabeaktu». Dat mearkkaša ahte luossa boahtá álo ruovttujohkii, lohká Ingrid Petrikke Olsen. Son lea Romssa universitehta doavtteroahpu jođiheaddji.
– Mii jáhkkit ahte sii geat besset Finnmárkkus lohkat, oidnet ávkki das. Go mis lei gáiddus buohccidivššároahppu, de vásiheimmet ahte 92 proseantta sis, geat oahpu gazze Finnmárkkus, bisánedje fylkii, lohká Olsen preassadieđáhusas.
