109 proavassuohkaniin lea Ráissa suohkan dat áidna suohkan gos ii leat nissonolmmoš leamaš báhppan. Dál sáhttá dat rievdat.
Bismmagodderáđđi fálai mannan bearjadaga Ráissa báhpavirggi Julie Schjøthi. Njuolga das maŋŋel dajai son Fremtid i Nord aviisii ahte ii leat vel mearridan galgá go váldit vuostá bargofálaldaga.
Vahkku sisa lea áigi vástidit, váldá go vuostá barggu.
Bismmagodderáđđi cealká ahte jus Schjøth ii váldde vuostá barggu, de áigot ođđasit almmuhit virggi rabasin.
Vuosttaš nissonolmmoš
Schjøth lea vuosttaš nissonolmmoš gii lea ohcan barggu Ráisii.
Čakčamánus lei son vuosttaš nissonolmmoš gii vihahuvvui báhppan Ráissa girkus.
Sáhttá namuhuvvot ahte ovddit geardde go báhppa vihahuvvui Ráissas, dassái lea 24 jagi áigi.
Dalle lei Julie Schjøth áhčči Hans Erik Schjøth gii vihahuvvui báhppan, dieđiha Davvi-Hålogalándda Bismmagoddi.
Gielddas ii leat fásta báhppa leamaš 2016 rájes, čállá Framtid i Nord.
