Vássán jahki lea njeaidán ollu dálkkádatolahusaid ja lea šaddamin buot lieggaseamos jahkin goassege, dadjá Máilmmi meteorologiijaorganisašuvdna (WMO).
Daid loguid vuođul mat bohtet ođđajagemánus gitta golggotmánu loahpageahčái, de lea jáhkehahtti ahte 2023 olaha máilmmiviidosaš lieggaolahusaid, dadjá ON-doaimmahat, mii dadjá ahte garra dálkkit leat dagahan billistemiid ja doaivvuhisvuođa miehtá jagi.
– Dálkkádatgássat leat eanet go goassege ovdal. Máilmmiviidosaš temperatuvra lea eanet go go goassege ovdal. Áhpi lea loktanan hirbmat olu. Mearrajiekŋa Antárktisis lea hirbmat vuollegaš, muitala WMO-hoavda Petteri Taalas.
WMO almmuhii gaskaboddosaš raporttas dálkkádaga birra dan oktavuođas go ON dálkkádatnjunuščoahkkin álggahuvvui Dubaias duorastaga.
Dálkkádatváikkuhusat eai leat goassege ovdal leamaš nu stuorrát ja dutkit leat várren ahte návccat ráddjet máilmmiviidosaš liegganeami leat unnumin.
2015 Parisa-šiehtadusas lea mihttomearrin ráddjet máilmmiviidosaš liegganeami vuollel 2 gráda ovdaindustriijalaš dásiid dássái, ja áinnas 1,5 gráda, jus lea vejolaš.
WMO raporta dadjá dattetge ahte máilmmis lea juo máilmmiviidosaš liegganeapmi 1,4 gráda bajábealde ovdaindustriijalaš dásiid.
