– Dat lea oskkufriddjavuhtii vuoitun ja nanne mánáid olmmošsuddjema, lohká Human-ehtalaš váldočálli Trond Enger.
– Dat lea oskkufriddjavuhtii vuoitun ja nanne mánáid olmmošsuddjema, lohká Human-ehtalaš váldočálli Trond Enger.
Golggotmánu 1. beaivvi rájes eai beasa osko- ja eallinoaidnoservvodagat šat oažžut dieđuid álbmotregistaris rievdadusaid dihte.
Norgga girku ii beasa šat oaidnit aiddoriegádan mánáid namaid ja sin váhnemiid namaid.
Girku ferte maid heaitit automáhtalaččat bidjamis mánáid namaid, geat eai leat gásttašuvvon, miellahttoregistarii dan ákkas go váhnemiid namat leat doppe.
Dakkár registreren lea ovdal dáhpáhuvvan vaikko váhnemat eai leat bivdán dahkat dan, ii ge leat addon diehtu ruovttoluotta ahte nu lea dahkkon. Mánát, geat eai leat gásttašuvvon, leat miellahttoregistaris gitta dan beaivái go devdet 18 jagi.
Stuora vuoitun
Birrasii 140 000 máná leat registrerejuvvon gullevaš miellahttun girku miellahtturegistarii.
Human-ehtalaš searvi lea guhkit áigge bargan eiseválddiid guvlui heaittihan dihte dan ortnega.
– Ollugat fuomášit ahte sii leat girkui registrerejuvvon go áigot dieđihit Human-ehtalaš searvái. Go lea dieđihuvvon oskoservvodahkii masa ii leat ieš dieđihan miellahttun, de dovdo dego priváhtaeallima invaderen, lohká Enger.
Heaittihit dan ortnega
Girkolágas leat mánát gullevaččat Norgga girkui riegádeami rájes jus juobbá váhnemiin lea Girku miellahttu.
Dalle ii leat nuppi váhnema eallinoaidnu guovddážis. Vaikko nuppi váhnemis ii leat šat dahkamuš girkuin maŋŋel go gásttašuvai, de šaddá aŋkke su mánná Girku miellahttun.
Leat maid muhtimat geat válljejit diktit mánáid leat gásttakeahttá, muhto fuomášit maŋŋelaš ahte mánát dan dihte leat girku registaris leamaš máŋggaid jagiid.
– Mii heaittihit oalát ortnega mas šattat automáhtalaččat miellahttun go ráđđehusa ođđa eallinoaidnoláhka boahtá 2019:s. Mii doarjut ođđa lága oktasaš njuolggadusain sihke Norgga girkui ja buot eará osko- ja eallinoaidnoservvodagaide, lohká Enger.
Miellahttuvuođa ferte ieš válljet
Human-ehtalaš searvi oaivvilda ahte ferte ieš aktiivvalaččat dieđihit miellahttuvuođa.
Sihke mánáide ja gullevaččaide osko- ja eallinoaidnuservvodagain fertejit váhnemat ieža doaimmahit sisadieđiheami.
– Maiddái go mánát devdet 15 jagi, de galggaše oažžut dieđu miellahttovuođa birra go sis lea alddis riekti dieđihit miellahttun gosa háliidit gullat, lohká Enger.
