Bellodat dárbbaša 5000 vuolláičállaga dohkkehuvvot registarii.
Bellodagat mat leat čálihuvvon registarii besset ohcat doarjaga jođihit politihkalaš doaimmaid ja cegget listtuid sihke gieldda-, fylkka- ja stuorradiggeválggaide. Dat vejolašvuohta ii leat Nordkalottfolket-bellodagas, muhto dál celket preassadieđáhusas ahte áiggošit čálihuvvot Bellodatregistarii.
– Čáliheapmái dárbbašit 5000 vuolláičállaga ja dál leat álgán dáinna čoaggimiin. Mii doaivut nu oallugat go vejolaš čállet vuollái. Ii, don it jienas min, muhto dušše doarjjut ahte mii galgat beassat geavahit min demokráhtalaš rievtti ohcat ekonomalaš doarjaga ja cegget listtuid, dadjá Toril Bakken Kåven preassadieđáhusas.
Nordkalottfolket stuorru
Odne leat Nordkalottfolket bellodagas ovcci sámediggeáirasa ja okta áirras Romssa ja Finnmárkku fylkkadikkis.
– Nordkalottfolket stuorru dađistaga ja dat muitala midjiide ahte álbmot davvin lea váillahan min jiena. Min bellodat lea vuođđuduvvon boares kulturoktavuođas mii mis lea davvin. Ovttasbargu ja ovttasdoaibman gaskkal sápmelaččaid, kvenaid ja norgalaččaid. Dát kulturoktavuohta lea máŋggaid duhát jagiid čađa hábmen min olmmožin ja servvodahkan, ja dat ánssáša jiena, dadjá Toril Bakken Kåven preassadieđáhusas.
