Romssa ja Finnmárkku fylkkamánni lea gidden skohterláhttu 6 Kárášjoga gielddas go bohccot leat hearkkes dilis heajus dálveguohtumiid dihtii. Skohterláhtu lea gaskaboddosaččat giddejuvvon njukčamánu 20. beaivvi rájes.
Romssa ja Finnmárkku fylkkamánni lea mearridan ahte skohterláhtu 6 Kárášjoga gielddas giddejuvvo gaskaboddosaččat njukčamánu 20. beaivvi rájes. Rukses sárggis kárttas čájeha guđemuš oassi láhtus giddejuvvo. Dat lea Ruvvašsullos, mii lea 16 km máttabeale Iškorasjoga, gitta skohterláhtu geahčai Andreas-Nilsen-barttas/Bajit Anárjoga álbmotmeahcis.
Buot sierralobit vuodjit dán guovllus leat gessojuvvon ruovttoluotta gaskaboddosaččat. Go mohtorjohtolatgielddus gessojuvvo ruovttoluotta, de lea sierralohpi fas lobálaš. Sivvan mohtorjohtolatgildosii lea bohccot mat rahčet heajus dálveguohtumiin.