Boahtte jagi lea Melodi Grand Prix 60 jagi. Ávvudeapmi galgá finálas Trondheim Spektrumis guovvamánu 15. beaivvi 2020:s.
Gilvu viiddiduvvo 25 artisttain olles riikkas, ja galget sáddejuvvot vihtta njuolggosáddaga riikaoassefinálain finála lassin.
– Lea hui hearva váldit MGP-finála Troanddimii musihkkagilvvu 60-jagi ávvudeami oktavuođas. Lea 31 jagi dan rájes go finála lágiduvvui olggobealde Oslo, nu ahte šaddá fiinna dáhpáhus. Mii sávvat Troandin ja reasta Norggas leat gergosat álbmotfestii gasku min riikka, dadjá prošeaktajođiheaddji Stig Karlsen.
Vihtta oassefinála
Boahtte jagáš Melodi Grand Prix lea earálágan go masa TV-geahččit ja MGP-fánssat leat hárjánan maŋimuš jagiid. 60-jagi ávvudeami oktavuođas leat vihtta oassefinála lávvordagaid ovdal finála Troanddimis. Oktiibuot oassálastet 25 artistta boahtte jagi.
Oassefinálat galget sáddejuvvot njuolga H3 arenas Fornebus, ja lea fokus olles riikka artisttaide. Juohke riikaoassi oažžu iežas lávvordaga, njealji artisttain geat galget ovttastit Davvi-Norgga, Gaska-Norgga, Vestlándda, Østlándda ja Sørlándda. TV-geahččit jienastit ovtta artistta viidáset finálii mii lea Troanddimis.
Vihtta artistta, geat gealbudahttet oassefinálas, galget deaivvadit viđain ovdalgihtii gealbudahttunartisttaiguin Troanddimis guovvamánu 15. beaivvi. Fágajurys, man jođiha MGP prošeaktajođiheaddji Stig Karlsen, lea bargu gávdnat dan vihtta artistta.
– Mii lohpidat buori lávlagiid ja artisttaid. Šaddá konfetti, čeahpes prográmmajođiheaddji ja buot eará mii gullá go Norgga stuorámus musihkkafeasta boahtá gávpogii. Šaddá maid earenomáš oaidnaleapmi diimmá vuitiiguin Keiinoin ja «Spirit in the Sky» lávlagiin, dadjá Stig Karlsen.
