-Almmuhus-
SMÁVVAOĐĐASATMáhtto­departemeanta evttoha njuolgga­dusaid goas oahpa­headdji sáhttá mannat gaskii 

Máhtto­departemeanta evttoha njuolgga­dusaid goas oahpa­headdji sáhttá mannat gaskii 

-

-

Dálá skuvllas lea stuorra eahpesihkarvuohta barggiid gaskkas goas lea lohpi mannat ohppiid gaskii. Departemeanta evttoha vuosttaš geardde reguleret dan lága.

– Norgga skuvla galgá oadjebas báiki gos mánát ja nuorat besset ahtanuššat searvevuođas. Oahpaheaddjit luohkkálanjas galget diehtit sihkkarit makkár váikkuhanvuohki sis lea jus oahppit leat vahágahttimin iežaset dahje earáid, lohká máhttoministtar Tonje Brenna preassadieđáhusas.

Dálá oahpahuslágas eai leat njuolggadusat goas bargi sáhttá mannat gaskii, vaikko sáhttá šaddat dakkár dilli ahte skuvlabargi ferte dan dahkat. Dat lea buktán eahpesihkarvuođa ja olusat leat ávžžuhan dan dili buoridit. Danin evttoha Máhttodepartemeanta ođđa njuolggadusaid oahpahuslágas ja priváhtaskuvlalágas. 

– Mii evttohat lágas ahte skuvlabargis lea lohpi mannat gaskii eastadan dihtii oahppi lápmašuhttit nuppi dahje bilidit opmodaga, lohká Brenna.

Dasa lassin evttohuvvojit maid eastadan- ja duođaštannjuolggadusat ja maid geatnegasvuođa dieđihit guktui beliid oaivila, jus lea šaddan mannat gaskii.

Nannet riektesihkarvuođa

Evttohuvvon njuolggadusat galggašedje nannet bargiid ja ohppiid riektesihkarvuođa. Njuolggadusaid mielde galgá bargis lohpi mannat gaskii jus jurdda lea eastadit dahje ráddjet vahágahttima ja galgá leat láđis ja oanehaš. Ovdamearkka dihtii sáhttá oahpaheaddji doallat ohppiid gitta bissehan dihtii doarruma, muhto doallan ii galgga bistit guhkit go lea dárbu. Mánáid rumašlaččat ráŋggáštit lea rihkolaš. 

– Čielgasut njuolggadusat eai iešalddis čoavdde váttisvuođa jus mánná ii láhtte olmmošlaččat skuvllas. Muhto njuolggadusat leat oassin čovdosis go dat nanne ohppid ja bargiid riektesihkarvuođa daid dilálašvuođain go lea dárbu mannat gaskii, lohká Brenna. 

Skuvllain lea geatnegasvuohta eastadit dakkár skuvlabirrasa, muhto jus šaddá mannat ohppiid gaskii, de oaivvilda Máhttodepartemeanta ahte galggašii ásahuvvot njuolggadus eastadit sávakeahtes dili. Danin evttoha departemeanta gáibádusa ahte gielddat ja fylkkagielddat galget fuolahit ahte bissovaš bargu biddjo johtui eastadit dakkár dili badjáneami. Evttohuvvon njuolggadusat leat sáddejuvvon gulaskuddamii, ja jus Stuorradiggi dohkkeha dan, de fápmoduvvá dat oktan ođđa oahpahuslágain borgemánu vuosttaš beaivvi 2024. 

-Almmuhus-