Astoáiggeguolásteaddjit geavahit boahtte mánuid sullii 12 miljovnna ruvnno oaggunkoarttaide, čázádagain maid FeFo lihttoláigoha Finnmárkkus.
Oaggunkoarttat leat jo vuovdimis maid 35 FeFo lihttoláigolačča hálddašit Finnmárkkus.
– FeFo-jogain lea leamaš buorre ovdáneapmi. Jogaid luossanálli lea leamaš buorre, ja maŋemus 20 jagi lea nálli duppalaston ja deaddu lea golmmageardánit lassánan, muitala FeFo direktevra Jan Olli.
Boahtte ija álgá luossabivdu
Disdaga gaskaija áiggi álgá luossabivdu Finnmárkku jogain, geassemánu 1. beaivvi. Dasa lassin álgá maid mearraluossabivdu dán ija, mii lea báikkálaš olbmuid vuoigatvuohta.
3,7 miljovnna juolludan
FeFo juolluda jahkásaččat doarjaga báikkálaš lihttoláigolaččaide. Ruhta manná bearráigehččui, kártemii ja divodeapmái. 2007 rájes lea 3,7 miljovnna ruvnno juolluduvvon servviide fylkkas.
Diibmá vuvde oaggunkoarttaid 11,83 miljovnna ovddas, mii lea 22 proseantta lassáneapmi 2014 rájes. Diibmá vuvde eanet oaggunkoarttaid ja haddi lei maid loktejuvvon.
Finnmárkku álbmogii dáhkádussan
Finnmárkkuláhka lea dáhkádus álbmogii ahte besset oaggut jogain. Jogat eai vuvdo goassege priváhta ealáhussii, ja lea buorri mii stuorru guossástalli oaggunárvvuin.
– Lea buorre ovdu midjiide Finnmárkkus go luossajogat leat finnmárkulaččaide vuosttažettiin. Báikkálaš olbmot galget maŋemusat guođđit jogaid jus fertejit muddet oaggumiid, muitala Jan Olli.
