Solveig Joks, gii otne gaskavahku bealušta iežas nákkosgirjji, lea iežas dutkamis gávnnahan ahte Deanoluosa iešvuohta lea earret eará ahte luossa dárbbaša ráfi.
Solveig Joks, gii otne gaskavahku bealušta iežas nákkosgirjji, lea iežas dutkamis gávnnahan ahte Deanoluosa iešvuohta lea earret eará ahte luossa dárbbaša ráfi.
Otne gaskavahku čakčamánu 14. beaivvi, de lea Solveig Joks bealušteame iežas nákkosgirjji «Laksen trenger ro. Tilnærming til tradisjonelle kunnskaper gjennom praksiser, begreper og fortellinger fra Sirbmá-området». Romssa universitehta lágida dilálašvuođa Diehtosiidda auditorias, Sámi allaskuvllas, Guovdageainnus ja lea rabas buot berošteddjiide.
– Luossa ii beasa ráfis
Vuođđun Solveig Joks dutkamii leat máŋggabealátvuođat luonddus ja máilmmis, duohtavuohta ja luondu ii leat ovdagihtii addon, muhto juoga mii šaddá olbmuid ja eará sivdnádusaid gaskka.
– Deanoluosa iešvuohta lea earret eará ahte luossa dárbbaša ráfi. Jus olbmot bivdet ijat beaivve, nugo ollu turisttat dahket go sii ostet jándorkoarttaid, dalle luossa ii beasa goassige leat ráfis, boahtá ovdán Joks dutkosis.
Erohusat máhtuin
Dutkan čájeha ahte erohusaid árbevirolaš máhtuid ja luonddudieđalaš máhtuid gaskka ferte dovddastit ja váldit vuhtii. Erohusaid čalmmustahttin lea vuosttas lávkin oaččuhit oidnosii ođđa máhtuid.
– Dasa lassin gáibiduvvo vuđolaš bargu fievrridit ođđa máhtu hálddašeapmái. Deatnulaččat geavahit ovdamearkka dihtii beaivválaččat doahpagiid nugo dulvi, coahki ja čázis, mii muitala sin oktavuođa birra detnui ja lussii. Diet dehálaš doahpagat eai leat odne oidnosis Deanu hálddašeami almmolaš dokumeanttain.
Galggašii ávkin hálddašeapmái
Deanu ássiid oktavuođat lussii ja detnui leat árbevirolaš máhtut, mat galggašedje boahtit ávkin Deanočázádaga hálddašeapmái. Dát máhtut leat iešheanalaččat ja danne fertešedje dat maiddái gieđahallot hálddašan dásis.
– Deanoluossa lea eará go dat mii almmolaččat gullo Deanočázádaga luosa birra. Deanoluossa boahtá oidnosii báikki olbmuid oktavuođain lussii ja detnui. Dán luosas leat eará iešvuođat go omd. Atlántalaš luosas, man iešvuođat leat šaddan luonddudieđa dutkama vuođul. Atlántalaš luossa lea šaddan lohkama ja mihtideami bokte.
Árvvoštallanlávdegoddi Joks nákkosgirjji bealušteamis leat:
Vuosttašamanueansa dr.phil. Gro Birgit Ween (Kulturhisorjja museas, etnografiija ossodagas) lea nammaduvvon vuosttaš vuostenákkahállin.
Dutki PhD Anne-Lill Drugge (Ubmi universitehta, Vaartoe/CeSam) lea nammaduvvon nubbin vuostenákkahállin.
Professor Emeritus Georges Midré (UiT Norgga árktalaš universitehtas, Instituhtta sosiologiijas, stáhtadieđa ja servodatplánejeaddji) jođiha árvvoštallanlávdegotti.
Nákkahállama jođiheaddji lea Instituhttajođiheaddji Marcus Buck (UiT Norgga árktalaš universitehtas, Instituhtta sosiologiijas, stáhtadieđa ja servodatplánejeaddji) jođiha nákkahállama.
