-Almmuhus-
OĐĐASAT– Lágat vearáskahttet riidduid boazodoalu ja vuovdedoaimmaid gaskkas

– Lágat vearáskahttet riidduid boazodoalu ja vuovdedoaimmaid gaskkas

-

-

Vuovdedoaimma ja boazodoalu riidduid lei sáhttit buorebut gieđahallat jus leat čielgaset njuolggadusat vuovdedoallolágain. Malin Brännström čujuha juste dasa su ođđa dutkosis Ubmi universitehtas.

– Go dán áigge analysere eaiggátvuođarievtti ja boazodoallorievtti oktavuođa, de ferte geahčadit dáhpáhusaid mat leat dolin leamaš. Muđuid ii oaččo ipmárdusa eanageavahemiid ektui mat dán áigge leat, muitala Malin Brännström preassadieđáhusastis.

 

Parallealla rievttit

Malin Brännström čilge doavtterdutkosis movt stáhta politihkka lea váikkuhan moalkás oktavuođa sin gaskkas geain lea riekti eatnamiidda.

Guhkit áiggi lea gávdnon beroštusriidu movt Norrlándda siseatnamiid galgá geavahit.

Lágas lea vuođđun ahte leat guokte ealáhusa maid galget stivret, muhto de eai oainne ahte stuorimus oassi ealáhusain leat parallealla rievttit geavahit eatnamiid.

– Dálá láhkaásahus ii čana eanarievttit doarvái oktii boazodollui. Lága bokte deattuhuvvo ahte lea boazoealáhus mii ferte suddjejuvvot. Riidu ii gieđahallo seamma ládje go eará riekteáššit mat leat eanaeaiggádiin, mii fas dagaha ahte riidu vearáska, lohká Malin Brännström.

 

Dutkan sáhttá leat ávkin

Analysa čájeha ahte dakkár mearrádusat, mat gávdnojit eará riekteosiin movt gieđahallat riidduid, váilu vuovdedoaimmain ja boazodoalus.

– Mun jáhkán ahte dutkan sáhttá leat ávkin álggahit ságastallama movt eanaeaiggádiid vuovdedoalu ja boazodoalu oktavuohta sáhttá regulerejuvvot ja gieđahallot riektevuogádagas, nu ahte sáhttet unnut riiddut mat leat dál, lohká Brännström.

-Almmuhus-