Girkočoahkkin Norgga girkus áigu nannet kvena giela ja kultuvrra girkus. Ođđa bargojoavku kvena girkoeallimii lea ásahuvvon.
– Kvena álbmotbeaivi lea dehálaš beaivi girkus. Mii čalmmustahttit kvenaálbmoga historjjá, giela ja kultuvrra. Dán beaivvi levget kvenaálbmoga leavggain. Girkus lávlut sálmmaid kvena sálbmagihppagis mii almmuhuvvui diibmá. Kvenaálbmot lea okta Norgga nationála minoritehtain, ja sis lea lunddolaš sadji Norgga girkus, dadjá girkoráđijođiheaddji Kristin Gunleiksrud Raaum, preassadieđáhusas.
Son deattuha ahte dát beaivi lea relevánta olles riikii:
– Vaikko dat árbevirolaš váldoguovllut kvena gielas ja kultuvrras leat Davvi-Hålogalánddas, de orrot kvenat miehta riika. Kvena álbmotbeaivi lea dehálaš girkui davvin gitta lulás.
Evttohit rievdadusaid organiseremis
2022:s meannudii Girkočoahkkin ahte kvena girkoeallin galgá nannejuvvot. Danne lea Girkoráđđi dál bidjan bargojoavkku mii galgá evttohit rievdadusaid mo kvena girkoeallin galgá organiserejuvvot Norgga girkus.
– 2010 rájes lea Norgga girkus leamaš nationála lávdegoddi kvena girkoeallimii, nammaduvvon Davvi-Hålogalándda bismagottis. Dat ođđa bargojoavku galgá geahččat mo girku galgá organiseret kvena girkoeallima boahttevaš jagiid, dadjá Raaum.
Bargojoavku galgá earret eará árvvoštallat makkár barggut ja ovddasvástádus nationála kvena orgánas berrejit leat, ja mo miellahtut galget nammaduvvot. Duohtavuođa- ja soabadankommišuvnna raporta mii almmuhuvvo geassemánu 1. beaivvi, galgá leat oassin joavkku barggus. Bargojoavkku evttohusat galget addot Girkoráđđái dán jagi.
Máŋggabealalaš oktiibidjan
Dán joavkkus leat vihtta olbmo. Golmmas dain leat nammaduvvon kvena ja Suoma/Norgga organisašuvnnain, ja guovttis fas Girkoráđi direktevrras. Bargojoavku oažžu čállindoarjaga Girkoráđi administrašuvnnas.
– Arne Willy Dahl, jođiheaddji, nammaduvvon Girkoráđi direktevrras
– Kristin Mellem, nammaduvvon Norgga kvenaid searvvis – Ruijan kvääniliitto
– Elin Marianne Seppola Brandvoll, nammaduvvon Kvena Suoma riikasearvvis – Kveeni Suomi Liitto
– Raija Nakken, nammaduvvon Norgga Suoma searvvis – Norjalais Suomalainen Liitto
– Åsne Kummeneje Mellem, nammaduvvon Girkoráđi direktevrras
