Idol-Tara oaččui odne Porsáŋggu gieldda 2014 kulturbálkkašumi.
Porsáŋggu gielddastivra mearridii odne ovttajienalaččat geiget 2014 kulturbálkkašumi Leavnnja niidii Tara Flåten Nicolaisenii. Tara lei álgoálggus evttohuvvon bálkkašupmái «Dan jagáš porsáŋgulaš, muhto bajásšaddan- ja kulturossodat mearridii sirdit su evttohassan kulturbálkkašupmái.
Nuorra ja áŋgir
Gielda cealká ahte Tara lea nuorra artista gii iežas áŋgirvuođain lea ovdánan ja šaddan dovddusin.
Tara Flåten Nicolaisen (18) šattai dovddus namman maiddái olggobealde Porsáŋggu ja Finnmárkku maŋŋel go searvvai beakkán Idol-gilvui ja beasai gitta finálii. Tara lea ge vuosttaš ja áidna Finnmárkulaš gii goassege lea beassan Idol-finálii.
Tara lea searvan sihke Nuoraid Kulturdeaivvademiide, Gaskaijarockii, Alta Soul og Blues-festiválii, Norske Talenter ja lea maiddái báikkálaš lávddiid alde leamašan.
– Čájehii olles Norgii
Bálkkašumi geigema oktavuođas cealká Porsáŋggu gielda ahte
– Idol-searvamin čájeha Tara olles Norgga álbmogii iežas earenoamáš buori lávlunjiena ja makkár taleanta son lea
Porsáŋggu gielda cealká ahte sii gieldda bealis leat rámis Tarain ja illudit čuovvut su ovdáneami artistan viidáseappot.
