NRK Sápmi ja Ávvir leaba bivdán listtonjunnošiid geat oassálastet sámedikkeválggaide 2017, vástidit moadde gažaldaga iežas birra. Dá lea okta kandidáhtain:
NRK Sápmi ja Ávvir leaba bivdán listtonjunnošiid geat oassálastet sámedikkeválggaide 2017, vástidit moadde gažaldaga iežas birra. Dá lea okta kandidáhtain:
Válgabiire: Ávjovárri
Bellodat: Bargiidbellodat
Namma: Kåre Olli
Ahki: 58
Siviiladilli: Náitalkeahtes, 4 máná
Eatnigiella/giella: – Human sámegiela ja dárogiela.
Beroštumit:
Makkár astoáigedoaimmat leat dus?
– Valáštallan, bivdu ja guolásteapmi.
Mii lea dat stuorámus maid leat vásihan eallimis?
– Oažžut mánáid.
Maid dagat go áiggut vuoiŋŋastit?
– Ii leat dárbu masage erenoamážit vuoi sáhtán vuoiŋŋastit.
Gii lea du stuorámus ovdagovva ja manne?
– Mu váhnemat, soai leaba addán munnje buori oahpu eallimis ja addán doaivaga ahte mun sáhtán dahkat erohusa geasa nu.
Bargu ja oahppu
Maid don barggat dál ja makkár barggut leat dus ovdal leamašan? Makkár oahppu lea dus?
– Barggan johtolatjođiheaddjin Boreal Buss AS:s ja lean bargan vuoddjin, johtolatassisteantan ja ossodathoavdan ovdal. Lean gazzan oahpuid agronoman, fágareivve terminálabargifágas, fágareivve ámmátvuoddjifágas ja vuođđokurssa giehtabarggus ja industriijafágas.
Politihkalaš duogáš
Makkár bellodagaid leat don ovddastan? Leatgo leamašan sámediggeáirras?
– Lean politihkas leamaš mielde 80-logu gaskamutto rájes, ja leamaš miellahttun suohkanstivrras Bargiidbellodaga ovddas Porsáŋggus 1995-2015 áigodagas. Lean várrelahttu Bargiidbellodaga ovddas Sámedikkis dán áigodaga.
Váibmoáššit
Makkár áššiide áiggut bidjat fokusa?
– Sámegillii ja vuoigatvuođaide.
Mii lea du mielas eanemus hástaleaddjin maid Sámediggi ferte čoavdit čuovvovaš áigodagas?
– Leat olu áššit mat berrejit čovdot áigodagas, muhto deháleamos áššit leat sihkkarastit ahte min nuorat ožžot vejolašvuođa oahppat sámegiela nu mo sis lea vuoigatvuohta. Odne leat menddo olu váttisvuođat daid iešguđet gielddain/fylkkain. Nubbe ášši lea mearrasámiid vuoigatvuođat resurssaide mearas.
Čilge manne/ manne eai galggašii minerála- ja ruvkefitnodagat oažžut lobi ásahit ja álggahit doaimmaid sámi guovlluin?
– Dás ii leat sáhka manne/manne eai. Jus visot guoskevaš bealit leat ovttaoaivilis ahte ruvkefitnodat lea ortnegis, de lea dat ortnegis ja muhtin guovlluin ii leat oba ge áigeguovdilis jearaldat dat.
Čilge doaibmá go dálá boazodoallopolitihkka vai ii. Mii šaddá deháleamos ášši mii guoská boazodollui čuovvovaš áigodagas?
– Boazodoallopolitihkka doaibmá muhto leat muhtin dehálaš áššit mat fertejit čovdot. Boazodoallopolitihkka ferte heivehuvvot, boraspirepolitihkka ferte rievdaduvvot ja heivehuvvot dan dárbbu mielde mii guođohanealáhusas lea guohtunareálaide boraspiriid haga.
Eanandoallu, maid sáhttá Sámediggi dahkat sihkkarastin dihte ahte nuorat sáhttet joatkit/ álgit ealáhusain?
– Bargat dan ala ahte rámmaeavttut eanandollui sámi guovlluin leat buorit ja ahte boraspirepolitihkka heivehuvvo guođohanealáhusa dárbbuide, dát guoská maid boazodollui.
Mii lea dat stuorámus hástalus guolástanealáhusas Sámis? Maid sáhttá Sámediggi dahkat nu ahte dat unnimus doalut maid sáhttet birgejumi viežžat guolásteamis?
– Báikkálašolbmuid vuoigatvuođat guolleresurssaide ja ahte lea vejolaš doaimmahit guollevuostáiváldima boaittebeale báikkiin.
Sámegielat, movt berre Sámediggi láhčit dili nu ahte nannejuvvojit čuovvovaš áigodagas?
– Láhčit dili vuoi sámegiella šaddá ovttadássásaš dárogielain juohke ládje ja bálkáhit sámegiela geavaheami. Mii fertet duostat dadjat ahte sámegiella lea dehálaš máhttu ja ahte mii árvvusatnit dan.
Makkár ođđa bargosajiid lea dehálaš vuoruhit čuovvovaš áigodagas?
– In oainne ahte Sámediggi galgá leat láidesteaddji ođđa bargosajiide. Vuođđoealáhusat, dát ealáhusat leat dehálaš kulturguoddit ja seailluhit máŋggabealatvuođa sámegielas.
Guhte ášši lea čuohcan dutnje eanemusat ja manne?
– Nuorat olggobealde sámi guovddáš guovlluid fertejit dokumenteret iežaset sámi duogáža vuoi sáhttet válljet sámegiela joatkkaskuvllain. Dat lea dohkketmeahttun, gii ferte dokumenteret eŋgelas, duiska dahje fránska duogáža vai beassá válljet dieid gielaid?
