Measta bealli Norgga dállodoaluin eai jáddat elrávdnjejuovlačiŋaid idjii. – Lea sihke dárbbašmeahttun ja njulgestaga váralaš, go dat han sáhttet buollát.
– Boares juovlačuovggat, heajos rávdnjefievrredeaddji dahje njulgestaga heajos dávvirat lea dábálaš sivat buollimiidda juovllaid áiggi. Mii sáhttet ieža skáidnen juovlačiŋaid dieđekeahttá, eat ge dieđe dan birra. Ii dárbbaš leat nu olu, lohká Frende Forsikring dáhkádusa buollináššedovdi, Øystein Øren, ja čájeha báberjuovlanástti mii lei buollán go peara lei menddo lahka báhpára.
Son muitala preassadieđáhusas ahte jahkásaččat leat olu buollimat go elrávdnjejuovlačuovggain sáhttá leat juoga boastut. Varas iskkadeapmi, man Norstat lea čađahan dáhkádusfitnodaga ovddas, čájeha ahte njealji logi dállodoalus eai jáddat juovlačuovggaid idjii dahje go eai leat olbmot dálus. Diibmá dieđihuvvojedje 31 000 buollinvahága dállo-, bartta- ja stohpogálvodáhkádusaide. Vahágat mákse 2.8 miljárdda kruvnna. Øystein Øren muitala ahte buollinvahágat sáhttet máksit mielahis olu, muhto lea veadjemeahttun bidjat hatti bearašlahtuide. Son rávve olbmuid leat várrugassan go geavahit elrávnnji.
