-Almmuhus-
-Almmuhus-
-Almmuhus-
OAIVILATJuoigan ii gula girkui ja kristtalašvuođa­ohppui

Juoigan ii gula girkui ja kristtalašvuođa­ohppui

-

-

Luohti ja juoigan ii gula girkui ja kristtalašvuođaohppui, danin orro áibbas boastut ahte mánát galggaše girkus juoigat, čállá Ellen Márjá Turi Gaup. 

Mun lean dál veaháš healkkehan ja suorganan go lean lohkan Ávvir aviissa, gos Bisma ja báhpat maid orrot nu bajás váldon luđiin ja juoigamiin. Go bisma oidno aviissas nu háliideame ahte mánát galggaše girkus juoigat, na gal dat gal orro áibbas boastut, mánáid oahpahit boasttu guvlui.

Nuppi aviissas lea fas báhppa mii orro dego liikome go olbmot leat álgán dohkkehit luođi ja juoigama. Dat orro gal mu mielas imaš ja dat orro gal mu ipmárdusa mielde hui boastut. Ii juoigan goit gula kristtalašvuhtii iige kristtalašvuođaoahpahussii, katekismusa ásahusaide; gásta, konfirmašuvdna, náittus ja vihaheapmi, jápmin ja hávdádeapmi. Diet dat gullet min olbmuid eallimii visot.

Ja eanas olbmot dain davviriikkain, Norggas, Suomas, Ruoŧas ja Dánmárkkus, sis lea dat oktasaš kristtalašvuođaoahppu leamašan guhkes áiggiid čađa ja sihkkarit gávdno ain anus muhtun báikkiin ja olbmuid duohken maid ii leat álki gávdnat. Bismmat ja báhpat han galggaše olbmuide ja mánáide baicce oahpahit dan čielga Ipmil sáni, mii guhkes áiggiid čađa lea leamašan dain davviriikkain. Dat lea katekismusa oahppu; 10 báhkkona, oskuartihkkalat, áhččemin-rohkos, gástasakrameanta, áltársakrameanta. Dat leat dat 5 oasi mat gullet min oskudovddastussii ja leat čállojuvvon Luther uhca katekismusii. Dat han lea ge dat Lutheránalaš apostalaš oskudovddastus ja kristtalašvuođa láhka ja evangelium maid otná girkoeiseválddit eai šat dohkket, nugo duođaid lea.

-Almmuhus-