Sihke Finnmárkkus ja Romssas lohket čielga «ii» oktiičaskimii.
Sihke Finnmárkkus ja Romssas lohket čielga «ii» oktiičaskimii.
Sentio lea čađahan iskkadeami NRK ovddas.
86 proseantta finnmárkulaččain eai háliidan oktiičaskiima, ja 73 proseantta romsalaččain eai háliidan oktiičaskima.
Álbmotjienasteami
Disdaga čielggai ahte Finnmárkku Bargiidbellodagas lea eanetlohku, ovttas Guovddášbellodagain ja Sosialisttalaš Gurutbellodagain, čađahit álbmotjienasteami.
Duorastaga čoahkkimis galgá Finnmárkku Fylkadiggi jienastit sihke šiehtadusa ja álbmotjienasteami. Lea guhká leamaš čielggas ahte Fylkadiggi hilgu šiehtadusa.
Jienastemiin sáddet čielga dieđu
Finnmárkku Fylkadiggi lea ovdal čielgasit hilgon oktiičaskima lulliránnjáin, ja ráhkadit ovtta stuora fylkka mii gokčá njealjádasoasi Norggas.
– Mii eat leat olahan guhkás demokráhtalaš proseassaiguin. Min leat hilgon Stuoradikkis guktii, ja áigot min bákkuin oktiičaskit. Álbmotjienastemiin mis lea vejolašvuohta sáddet nana dieđu man garra vuosteháhku duođai lea, logai fylkkasátnejođiheaddji Ragnhild Vassvik NTB:i disdaga.
Ministtar ii doarjjo
Vassvik lohká ahte álbmotjienasteapmi lea finnmárkulaččaid maŋemuš vejolašvuohta čielga dieđu addit gieldaministarii, ráđđehussii ja sin doarjjabellodahkii, Risttalaš Álbmotbellodahkii.
Gieldaministtar Monica Mæland logai Stuoradikki gažandandiimmus ahte ii doarjjo álbmotjienasteami, ja čujuhii dasa ahte Stuoradiggi lea juo mearridan oktiičaskima.
Gielda- ja ođasmahttindepartemeantta lea duođaštan NTB:i ahte eai leat makkár ge formálalaš hehttehusat doallat álbmotjienasteami Finnmárkkus.
Álbmotjienasteapmi čađahuvvo Finnmárkkus ovdal geasi.
(©NTB)
