Borramuša ja alkoholakeahtá juhkamušaid hattit njidje 3,6 proseanttain skábmamánus, buohtastahttojuvvon diimmá ektui.
– Gávppašeddjiide boahtá buorrin dállodoallogávpemárkana garra gilvu go juovlabasit lahkonit. Elrávdnjehattit leat ain alladat ja de lea gilvu dehálaš ruovttudoaluide. Borramuš ja juhkamuš dagaha eambbo go njeallje ruvnno juohke logi ruvnnus maid geavaha juovlagávppašeamis, dadjá Virke gávppašanpolitihka jođiheaddji, Jarl Hammerstad preassadieđáhusas.
Virke merošta olbmuid gávppašit badjelaš 27,6 miljárdda ruvnnu ovddas earret eará dállodoallogávppiin, kioskkain, biergo- ja guollegávppiin, Viidnemonopolas ja bensinstašuvnnain juovlamánus. Lea 7,0 proseantta unnit go diibmá, muhto 12 proseantta eanet go guovtti jagi áigi.
