Dán rádjái 2017:s leat boraspiret goddán eanet bohccuid go oktiibuot 2016:s.
Dán rádjái 2017:s leat boraspiret goddán eanet bohccuid go oktiibuot 2016:s.
Nationen čállá ahte dán rádjái leat registreren 779 bohcco mat leat goddon boraspiriide. Birasdirektoráhtta duođašta ahte dán jagi leat boraspirevahágat lassánan diimmá ektui. Gonagasgoaskimat ja geatkkit leat eanas vahágiid dahkan.
– Vahágat leat stuorábut go maid oažžu duođaštuvvot, go ii leat šat ollu báhcán ráppiin maŋŋel goaskimiid, dadjá Ellinor Jåma Norgga Boazosápmelaččaid Riikkasearvvis.
Son dadjá ahte Stuoradiggi lea mearridan man olu goaskimat Norggas galget leat, muhto eai leat árvvoštallan guđe guovlluin.
– De berrešii juohkit náli olles riikii, nu go eará náliiguin dahket. Guovlluin gos leat biebmoeallit leat váttisvuođat stuorrát, ja doppe lea olbmuin doaivvuhisvuohta go oidnet ahte goaskimat váldet elliid, dadjá Jåma.
Dálkkádat- ja birasministtar Vidar Helgesen (Olgeš) lea evttohan vuolidit ráji vai beassá njeaidit gonagasgoaskimiid.
