Go kárášjohkalaš Jon Petter Anti lei dronain girdime dán geasi, de vásihii son ahte goaskin vikkai fallehit su girdinrusttega.
Go kárášjohkalaš Jon Petter Anti lei dronain girdime dán geasi, de vásihii son ahte goaskin vikkai fallehit su girdinrusttega.
Jon Petter Anti lea Spiertagáissá boazoeaiggát ja lei bohccuid ohcame geasseorohagas, go vásihii ahte goaskin vikkai fallehit su drona. Go girdá dronain mas lea kamera, de čuožžu ieš vuollin ja čuovvu mielde šearpmas. Anti čuovui mielde goaskima sihke čalmmiiguin ja šearpmas.
– Mun oidnen goaskin luoitilii sojiid ja girddii drona guvlui, muhto de duottuhuvvui, iige čuolastan, muitala Anti. Son árvvoštallá goaskin lei lagamusas birrasii logi mehtera eret dronas.
(Ášši joatka video vuolábealde)
Video bajit ravddas oainnát man lahka goaskin lei. Geahča áinnas video HD-kvalitehtas. Filbmen: Jon Petter Anti
Čorraga vuojehit
Anti muitala son lei girdime geasseorohagas, go lei iskame vejolašvuođaid sáhttá go vuojehit bohccuid dronain.
– Jurdda lea geahččat sáhttá go droinan johtit čorragiin, go lea čohkkeme ealu, lohká son. Son lea geahččaladdan dálvet girdit bohccuid bajil, ja lohká bohccot ballet dronas.
(Ášši joatka gova vuolábealde)
Anolaš boazobarggus
Anti leage dronain girdán sullii 300 tuvrra ja lohká dainna lea hui álki várdát.
– Imaštalan go eanet orohagat eai leat váldán atnui dákkár drona go dat lea boazobarggus hui anolaš diŋga.
Son oaivvilda maid dainna seastit sihke iežas ja eatnama go ii dárbbaš vuodjit nu ollu.
