-Almmuhus-
-Almmuhus-
-Almmuhus-
OĐĐASATGirko­njárgga buohcce­viessu fiskes dásis

Girko­njárgga buohcce­viessu fiskes dásis

-

-

Guokte pasientta ja 15 bargi  leat erremis dahje isolašuvnnas maŋŋel go Girkonjárgga buohcceviesu bargis fuomášedje covid-19. 

Pasieanttat ja bargit leat oktavuođat dasa geas lea covid-19, ja sii biddjoje rutiinna mielde erremii ja isolašuvdnii dakkaviđe go boađus čielggai mánnodat eahkeda. 

– Sus geas lea duođaštuvvon dávda, eai leat dávdamearkkat, muhto lea čuvvon njuolggadusaid go lea máhccan mátkkis ja lea iskkahan iežas, čállet sii preassadieđáhusas.  Preassadieđáhusas čilge buohcceviessu ahte leat árrat sáhttán bidjat doaimmaid johtui dan geažil go son lea čuvvon njuolggadusaid, ja nu ožžo buori bajilgova njoammumis. 

Mátta-Várjjaga doavttir maid guorrá

Girkonjárgga buohcceviessu lea álgán guorrat njoammuma, ja jearahallat sin geat leat olbmo oktavuođat vai dárkilit sáhttet kártet dili. Máŋga bargi leat váldon eret barggus eastadandihte njoammuma, ja dát árvvoštallo sin dieđuid mielde dárkilit. Maiddái njoammunsuodjalandoavttir Mátta-Várjjagis lea leamaš fárus njoammunguorramis. 

Fiskadin 

Dás leat váikkuhusat. Girkonjárgga buohcceviessu lea šluhtten muhtin pasientadeaivvademiid distaga, ja sáhttet vel eambbo maŋidit diimmuid lagamus beivviid. Finnmárkku buohcceviessu dieđiha sii váldet oktavuođa daiguin pasieanttaiguin geaidda dát guoská. 

Girkonjárgga buohcceviessu lea dán geažil fiskes gearggusvuođadásis. Muhto Finnmárkku buohcceviessu, masa Girkonjárgga buohcceviessu gullá, gal lea ain obbalaččat ruoná dásis. 

 

 

-Almmuhus-