Frode Berg-ášši lea dagahan Girkonjárgii ođđa namahusa, spiovdnagávpot. – Ii soaitte leat nu suohtas, dadjá báikkálaš dutki.
– Gii háliida fárret spiovdnagávpogii? Dat ii leat govva maid háliida báikkálaččat, dadjá Barentsinstituhta Bjarge Schwenke Fors.
Sotnabeaieahkeda bođii spiovdnadubmehallan Frode Berg ruovttoluotta ruovttubáikái, mii lea Ruošša rájá alde. Ášši norgalačča birra gii váldui gitta spionerema dihtii, lea ožžon internationála fuomášumi.
Earret eará BBC lea leamašan guossis rádjegávpogis ja ráhkadan reportáša «Inside Norway’s spy town».
