Finnmárku lea njunnožis TV-akšuvnnas, maŋŋil go suohkaniid ja fylkka doarjagat leat coahkkán sisa. Finnmárkku fylkkagielda lea dorjon dán jagáš TV-akšuvnna ruvnnuin juohke ássi nammii.
Finnmárku lea njunnožis TV-akšuvnnas, maŋŋil go suohkaniid ja fylkka doarjagat leat coahkkán sisa. Finnmárkku fylkkagielda lea dorjon dán jagáš TV-akšuvnna ruvnnuin juohke ássi nammii.
Dál lea Finnmárku addán eanemus TV-akšuvdnii.
– Finnmárku lea stuorrume, ja dat vuhtto dan guovtti maŋemuš TV-akšuvnnas, lohká fylkkasátnejođiheaddji Runar Sjåstad. Son lea maid NRK TV-akšuvnna sáhkadoalli Finnmárkkus.
Dehálaš Finnmárkkus
Finnmárkku fylkkagielda lea dál dahkan nu go ránnjáfylka Romsa, ja addán ruvnno juohke fylkka ássi nammii TV-akšuvdnii.
Dál álget fitnodagaid áŋgiruššamat ja Sjåstadas lea jáhkku ahte Finnmárku čájeha buori gova dán jagi.
– Rukses Ruossa lea leamaš hui dehálaš organisašuvdna min servodagas juo čuođi jagi. Sii leat leamaš stuora oassi das ahte álbmot lea beassan hukset iežaset servodagaid. Dál mii galgat doarjut Rukses Ruossa vai besset olgoriikkas dahkat buoret barggu. Seammás addit báikkálaš Rukses Russii doarjaga veahkehit báhtareddjiid mat deike bohtet. Jáhkán ahte lea vuosttaš háve dan rájes go Nasjonalhjelpen veahkehii hukset Finnmárkku maŋŋil soađi, ahte Finnmárku čájeha ahte mii nagodit máksit ruovttoluotta, lohká Sjåstad.
Veahkehit olbmuid soađis
Nasjonalhjelpen 1946:s lei álgu dálá TV-akšuvdnii, ja dalle manai ruhta sidjiide geat gillájedje nuppi máilmmi soađi geažil.
Dán jagi mannet ruđat veahkehit báhtareddjiid integrerejuvvot min servodahkii, ja veahkehit olbmuid geat leat báhtaran soađis.
Dál lea Finnmárku njunnošis dán jagi TV-akšuvnnas, ja lea Kárašjoga gielda mii sáhttá leahkit gielddaid vuoiti. Fylkkasátnejođiheaddji sávvá ahte fitnodagat servet, ja addet ruđa.
– Dain stuora ruhtačoaggimiin 70-logus lei Finnmárku álo njunnošis. Dalle muittii Finnmárkku álbmot movt lei leahkit báhtareaddjin. Jáhkán ahte lea áin muittus go Rukses Ruossa lei diibmá ráji alde, vuostá váldime báhtareddjiid, ja veahkeheame servodagaid vuostá váldimiin. Erohus dál lea ahte mii sáhttit vel eambbo veahkehit dán háve, lohká Sjåstad.
Rukses Ruossa dán jagi TV-akšuvnnas
Golggotmánu 23. beaivvi lea dán jagi TV-akšuvdna. Dalle vázzet ruhtačoaggit viesus vissui ja čogget ruđa.
Dán jagi manná ruhta Rukses Russii, geat áigot ruđa atnit veahkehit olbmuid geat gillájit soađi dihte, juo go Syrias, Libanonas, Lulli-Sudanas, Afghanistanas, Myanmaras, Somalias, El Salvadoras, Guatemalas dahje Hondurasis.
Oassi adno maid veahkehit báhtareddjiid geat leat Norgii boahtán.
