Jáhkkimis doalaha Finnmárkku fylka ovddeš vearjogalbba. Fylkkaráđđi háliida doalahit ovddeš vearjogalbba mii govve Várjjat ladni golleivnnis čáhppes ivnnat vuođu alde.
Finnmárkku fylkka vearjogalba dohkkehuvvui gonagaslaš mearrádusain 1967:s. Vearjogalba lea oalle dovddus ja leamaš Finnmárkku kulturguoddi, čállá Finnmárkku fylkka gulahallanhoavda Trond Magne Henriksen preassadieđáhusas.
Ekonomalaččat vuogas
Fylkkaráđi jođiheaddji Kristina Torbergsen (Bb) mielas lea vuogas geavahit daid Finnmárkku ja Romssa fylkkaid ovddeš vearjogalbba, nu ahte Finnmárku ja Romsa eai dárbbaš ođđa vearjogalbbaid oastit, masa manašii sihke áigi ja ruhta.
– Goluid ektui, de lea vuogas geavahit fylkkaid ovddeš vearjogalbbaid, lohká son.
Nu guhká go Romsa ja Finnmárkku leat oktiičaskojuvvon, de geavahit Romsa ja Finnmárku oktasaš vearjogalbba. Jagi geahčen earránit dát guokte fylkka.
Fápmu finnmárkkulaččaide
Lei dáiddára Hallvard Trætteberg evttohus geavahit Várggáid ladni gova fylkka vearjogalban maid fylkadiggi dohkkehii 55 jagi dás ovdalis. Iežas jurdaga ákkastallamis, čálii son: «Ladni galggašii govvet kultuvrra mii fas čuožžilii maŋŋá soahteroasuid ja váttisvuođaid. Dat mearkkašivčče oadjudeaddji fámu Finnmárkku álbmogii.»
Fylkadiggi meannuda fylkka vearjogalbba ášši juovlamánu čoahkkimis.
