Jus Finnmárkkus manná olmmoš čađa jieŋa ja gártá čázi vuollái, de fertejit buollinčáskadeaddjit vuordit dassái go Álttás bohtet gádjunbuokčit.
Jus Finnmárkkus manná olmmoš čađa jieŋa ja gártá čázi vuollái, de fertejit buollinčáskadeaddjit vuordit dassái go Álttás bohtet gádjunbuokčit.
Kárášjoga gieldda buollinčáskadeddjiid hoavda Nils Asllat Kildedam čilge ahte sis eai leat buokčit Kárášjogas jus olmmoš manná čađa jiekŋa ja šaddá čázi vuollái.
– Mis eai leat gádjunbuokčit Kárášjogas, ja lea 110-guovddáža vuollái biddjon buot mii guoská buokčamii. Jus geavvá lihkohisvuohta, ahte olmmoš šaddá jieŋa vuollái, de sádde 110-guovddáš helikoptera mas leat gádjunbuokčit mielde.
Goitge ovddemus báikkis
Son muitala unnibuš buollinčáskadanstašuvnnaide, nu movt sii leat Kárášjogas, ja maiddái Guovdageainnus, de ii leat dimenšuvdnaláhkaásahusaid mielde mearriduvvon ahte galgá leat gádjunbuokči.
– Dat goitge ii mearkkaš ahte mii eat leat gergosat jus olmmoš manná čađa jieŋa. Mis leat rusttegat maiguin sáhttit gádjut olbmuid čázis, nu movt goikebiktasat ja fanas, ja mii leat dábálaččat ovddemus báikkis. Muhto mis ii leat váldi buokčalit, lohká Kildedam.
Dál lea dan muttos áigi jagis go buolašta ja jávrrit ja jogat jikŋot.
Jieŋat sáhttet rašit ja Kildedam rávvege dan dihte olbmuid vánddardit várrogasat iige rasttildit rašes jieŋaid.
– Erenoamážit sáhttá joga jiekŋa várálaš go lea golgi čázis, lohká Kildedam.
(Ášši joatká gova vuolábealde)
Finnmárkku áidna gádjunbuokčalanfálaldat
Álttá suohkanis leage áidna gádjunbuokčanfálaldat olles Finnmárkkus, ja buollinčáskadeddjiid hoavda Knut E. Suhr muitala olles Norggas leat obbalaččat hui unnán buollinstašuvnnat gos leat buokčit, birrasii nuppelohkái lagabui golbmačuođi stašuvnnas.
– Sivvan dasa lea go lea hui divrras váldit oahpu gádjunbuokčaleamis ja dasa leat garra gáibádusat.
Ii leat gearggusvuođafálaldat
Son muitala suohkanis lea gádjunbuokčanfálaldat eaktodáhtolaš, iige leat makkárge gáibádus ahte dat galgá.
– In áiggo árvvoštallat lea go doarvái dušše ovttain fálaldagain, danne go lea eaktodáhtolaš doaibma. Mis ii leat dieđusge gearggusvuođafálaldat, mii mearkkaša ahte mis leat gádjunbuokčit olleáigge vávttas.
Suhr oaivvilda ahte lea stuora oadjebasvuohta olles fylkka álbmogii, go gávdno fálaldat.
– Mis leat gávcci olbmo geat leat buokčit ja vel golbma sadjásaš buokči, nu ahte mis leat oktiibuot 11 buokči, lohká son.
