-Almmuhus-
OĐĐASATDuohtavuođakommišuvdna áššin fylkkadikkis

Duohtavuođakommišuvdna áššin fylkkadikkis

-

-

Finnmárkui lea lunddolaš doarjut gáibádusa ásahit duohtavuođakommišuvnna, čállá fylkkaráđđe­almmái áššái mas lea sáhka cealkámušain doarjut duohtavuođakommišuvnna ásaheami sámiid ja ­kvenaid dáruiduhttima hárrái.

Finnmárkku fylkkadiggi áigu dán vahku meannudit ášši das galgá go addit doarjjacealkámuša gáibádussii ásahit duohtavuođakommišuvnna mii galgá guorahallat dáruiduhttinpolitihka maid sámit ja kvenat leat gillán Norggas.

 

Dáruiduhttinpolitihkka

Dáruiduhttin lei almmolaš politihkka man ulbmil lei dáruiduhttit sámi ja kvena álbmogiid 1800-logu gaskkamuttu rájes. Dat bisttii badjel čuođi jagi. Ulbmil lei sámiid ja kvenaid ollásit dáruiduhttit.

Dat politihkka dagahii ahte ollugat masse iežaset čearddalašvuođa, sápmelašvuođa ja kvenavuođa, ja iežaset gullevašvuođa sámi ja kvena servodagaide ja maid vejolašvuođa oahppat iežaset eatnigiela. Ollugat ellet ain otná dan beaivvi máŋgga láhkai dáruiduhttinpolitihka maŋŋil čuovvovaš váikkuhusaiguin.

Ulbmil duohtavuođakommišuvnnain lea duođaštit ja gaskkustit duohtadieđuid dáruiduhttinpolitihka ja dan váikkuhusaid birra ja hukset vuođu boahtteáigásaš čovdosiidda mat veahkkin sáhttet njulget dáruiduhttinpolitihka čuovvumušaid.

 

Stuorradiggi meannuda ášši geassemánu 20. beaivvi

Kirsti Bergstø ja Torgeir Knag Fylkesnes dat áššebáhpáris Dok. 8:30 S (2016-2017) álggus ovddideigga evttohusa ásahit dákkár duohtavuođakommišuvnna.

Maŋŋil leat Romssa, Nordlándda ja Lulli-Trøndelága fylkkasuohkanat mearridan doarjjacealkámušaid.

Miessemánu 15. beaivvi lei rabas gulaskuddan Stuorradikki Bearráigeahččan- ja konstitušuvdnalávdegottis dán fáttá birra. Dasa searvvai fylkkasátnejođiheaddji Runar Sjåstad.

Evttohus duohtavuođakommišuvnna birra galgá maiddái meannuduvvot Stuorradikkis. Dat dáhpáhuvvá geassemánu 20. b. 2017.

-Almmuhus-