-Almmuhus-
OĐĐASATDuhpátpáhkas ii galgga geasuheaddji hápmi

Duhpátpáhkas ii galgga geasuheaddji hápmi

-

-

Máilmmi duhpátkeahtes beaivvi almmuhuvvui duhpátpáhkaid ođđa hápmi mii ii galgga geasuhit nuorat olbmuid borgguhišgoahtit.

Duolvalágan ruoná ivdni lea ođđa sigareahtta- ja duhpátpáhkain fargga, ja dušše ivdni sáhttá veahkkin dasa ahte nuorat eai borgguhišgoađe. Semináras, mii lágiduvvui odne, almmuhii dearvvašvuođaministtar Bent Høie ráđđehusa buktit láhkarievdadeami evttohusa Stuoradiggái geassemánus.

Evttohuvvo ahte duhpátpáhkaid ivdni galgá rievdat, ja Borasdávdasearvvi visttis čájehuvvui ođđa hápmi. Duolvalágan ruoná ivdni, ja govat mat muitalit man várálaš lea borgguhit. Buot páhkain galgá seamma hápmi čállosis. Snuvsadoasat galget maid rievdaduvvot nu ahte buot doasain lea seamma hápmi.

 

Máilmmiviidosaš duhpátkeahtes beaivi

Máilmmiviidosaš duhpátkeahtes beaivi lea miessemánu 31.beaivvi juohke jagi. Máilmmi dearvvašvuođaorganisašuvdna álggahii dán mearkabeaivvi 1988s, ja lea máilmmiviidosaš.

Mihttu dáinna beivviin lea čalmmustahttit buozalmasvuođaid ja jápminsivaid mat gusket duhpátgeavaheapmái, ja movt sáhttá eastadit daid.

Dieđut: roykfritt.no

Buorre ovdamearka

Høie muitalii ahte Austrália lea čađahan dán rievdadeami.

– Dat lea mannan hui bures. Áiggun giitit Austrália go leat gallán dán luotta midjiide, dajai Høie.

Dearvvašvuođaministtar lohká duhpátindustriija geahččalit juohke ládje bissehit ođđa duhpáthámi, muhto son lea sihkar ahte sii eai lihkostuva dainna.

 

Ožžot doarjaga

Høie lohká ahte eiseválddiin lea riekti čađahit dakkár doaimmaid vai gáhttejit álbmotdearvvašvuođa, ja Máilmmi Dearvvašvuođaorganisašuvdna čájeha maid ahte sii dorjot evttohusa.

Statistihkka čájeha ahte leat dađi eanet nuorat mat eai álgge borgguhit, muhto nuorat álget baicce snuvssaiguin. (©NTB)

-Almmuhus-