-Almmuhus-
OĐĐASATDavvi Dearvvaš­vuohta lea gearggus girddi­hit eambbo pasi­eanttaid

Davvi Dearvvaš­vuohta lea gearggus girddi­hit eambbo pasi­eanttaid

-

-

Davvi Dearvvašvuohta lea gearggus geasehit eambbo pasieanttaid riikaoasis, dahje olggobeallái jus lea dárbu

. – Háliidan sihkkarastit buot pasieanttaid ahte mii bidjat olu návccaid dasa ahte lea doarvái fievrridankapasiteahta, dadjá Davvi Dearvvašvuođa hálddašeaddji direktevra Cecilie Daae, Davvi Dearvvašvuođa preassadieđáhusas.

Maŋŋel go Hámmárfeasttas čuožžilii njoammun, de lea Davvi Dearvvašvuohta nanusmahttán fievrridanválmmasvuođa garrasit – earenoamážit Finnmárkkus.

– Pasieanttat sáhttet leat dorvvolaččat das ahte mii dađistaga ain nanusmahttit háhkanvejolašvuođa fievrrideapmái nu ahte lea olahanmuttus ja dásset, sihke áimmus, mearas ja gáttis, dadjá Cecilie Daae.

Stuorra fievrridandárbu

Leat guhkes gaskkat Finnmárkkus, ja dat addá stuorra hástalusaid dál go Hámmárfeastta buohcciviessu ii váldde vuostá pasieanttaid njoammunleavvama eastadeami dihte. Buohcciviessu váldá vuostá fáhkkatlaš pasieanttaid.

Dárbu sihkkarastit buori fievrridankapasitehta lea stuorát go dábálaččat. Finnmárkkus lea girdi jođáneamos fievrrideapmi, ja Davvi Dearvvašvuohta lea ovttas Áibmoambulánsafálaldagain ja Finnmárkku buohcciviesuin nanusmahttán girdiválmmasvuođa mearkkašahtti.

– Mis lea fievrridanvuogádat mas lea buorre kapasitehta nu go dál árvvoštallat dilálašvuođa. Mii geahččalit čađat geavahit dan buoremus lági mielde. Pandemiijas, ja go leat olu ođđa ambulánsadárbbut, leat kompleaksa árvvoštallamat mat čađat fertejit váldot. Mis leat čeahpes fágaolbmot buohcciviesuin geat gieđahallet dan, dadjá Daae preassadieđáhusas.

Lassiresurssat

Dábálaččat čužžot Álttás guokte ambulánsagirdi, Girkonjárggas okta ambulánsagirdi ja ambulánsahelikopter, okta gádjunhelikopter Leavnnjas ja Romssas okta ambulánsagirdi ja okta ambulánsahelikopter.

Davvi Dearvvašvuohta lea láigohan liigeambulánsagirdiid. Álttás lea jetgirdi skábmamánu 1. beaivvi rájes. Girkonjárgii lea láigohuvvon liigeambulánsagirdi golggotmánu 31. beaivvi rájes. Bådådjos lea Widerøe-girdi man leat ođasmahttán nu ahte das lea njoammuneastadanseaŋga. Dat lea leamaš doaimmas jo cuoŋománu rájes, ja sáhttá girdit miehtá riikka. 

-Almmuhus-