-Almmuhus-
-Almmuhus-
-Almmuhus-
OĐĐASATDálkkádat čuohcá elgii

Dálkkádat čuohcá elgii

-

-

Ruoŧas leat gieskat čađahan dutkama mii čájeha movt dálkkádat lea čuohcan ealganállái.

Dutkan, man lea Ruoŧa eanandoallouniversitehta Ubmis lea čađahan maŋemus 20 jagi, čájeha ahte ealgga miesit jápmet go dálkkádat lieggana. Dat mat ellet, leat geahppaseappot. Dan čállá nationen.no

Universitehta leat dutkan  ja duođaštan váikkuhusa miehtá Ruoŧa, ja eanemus váikkuhus lea Lulli-Ruoŧas Svealandas ja Götalandas. Doppe lea miesit gehppon 10 kiloin dan rájes go dutkan álggahuvvui.

Norrland leanas eai nu olu geahppaseappot.

Dutkit dadjet ahte ealga lea dakkár ealli mii loaktá buoremusat galbmadálkin ja buollašis, ja danin váikkuha misiide hui olu jus miessemánus ja geassemánus leat hui báhkat. Áldu ii de leat doarvái mielkái go beare báhkat leat, mii fas váikkuha hui olu dasa movt misiin lea šaddu.

De čájeha ge dat dutkan ahte leat olles 10 kiloin gaskamearálaččat gehppon.

Dutkit leat maid buohtastahttán muhtun báikkiiguin Amerihkás, gos ealga lea oalát nohkan. Dál sii ballet seamma dáhpáhuvvat Lulli-Ruoŧas jus ain šaddet lieggaset dálkkádagat.

-Almmuhus-