Borramušgálvogávpi Coop galgá vuovdit gálvvuid mat leat mannan «buoremus ovdal» -dáhtona meattá 70 proseantta hálbbádussii geahččaleamis unnidit borramušgolaheami.
– Mii leat dahkan ollu buori dakko guhká. Dál mii áŋgiruššat vel eanet borramušgolaheami vuostá dainna lágiin ahte vuovdit gálvvuid mat leat mannan «buoremus ovdal» -dáhtona meattá ollu hálbbiduvvon haddái, dadjá Coop Norge guoddevašvuođa jođiheaddji, Siri Krona Johnsen.
Áŋgiruššan boahtá maŋŋel go ráđđehusa Borramušgolahanlávdegoddi ovddidii evttohusaid mo Norga sáhttá unnidit borramušgolaheami beliin ovdal jagi 2030.
Coop doaibmabidju lea oaivvilduvvon álkidahttit geavaheddjiide buvddas, ja boahttevaš vahkkuid galgá dat váldojuvvot atnui buot sin borramušgávppiin Norggas. (©NTB)
