-Almmuhus-
OĐĐASATČierastallanluohkká fas rahppon

Čierastallanluohkká fas rahppon

-

-

Vaikko lea geassemánnu ja čierastallanluohkát dábálaččat leat mánu ovdal giddejuvvon, de leat fas rahpan luohkáid Suoločielggis go čoaska dálkkit leat bistán guhká.

Suoločielggi čierastanbáikkis leat rahpan luohkáid golmma beaivái, máŋggaid vahkkuid maŋŋel go rievtti mielde leat nohkán čierastanáigodat. Sivvan dasa lea go báikkis lea ain hui ollu muohta ja čoaska dálkkit leat bistán guhká, muitala Eye on the Arctic neahttasiidu.

 

Ain ollu muohta

– Mii leat movttegat go sáhttit fállat olbmuide dán erenoamáš vejolašvuođa, muitala čierastallanguovddáža jođiheaddji Jarmo Katajamaa.

Lea ain ollu muohta davviguovlluin, ja Suoločielggis dieđihit leat gaskkal 50 ja 100 centimehtera muohttaga.

 

Gaskaijabeaivvádagas čierastallat

Duorastagas lávvordahkii lea luohkká rabas beaivet. Seammás lea duorastateahkeda ja bearjadateahkeda rabas sidjiide geat áigot gaskaijabeaivvádagas čierastallat.

Čierastallanáigodat Suoločielggis nogai almmolaččat miessemánu 14.beaivvi.

-Almmuhus-