Porsáŋggu musea rahpá Sámi álbmotbeaivvi čájáhusa «Árbediehtu – sámi máhtolašvuohta eanandoalus ja meahcásteamis».
Pressemelding
– Sámegiella lea rikkis giella ja leat olu sánit mat čilgejit eatnamiid, luondduproseassaid, elliid ja olbmo luonddu. Dat kultuvrralaš riggodat gullo vuosttažettiin njálmmálaš muitalusain ja bargguid bokte. Sámi kultuvrras lea maid birgen, sihke meahcis ja olbmuiguin, guovddážis, čállá Porsáŋggu musea preassadieđáhusas.
Musea čilge viidáseappot ahte davvisámegielsátni árbediehtu muitala ahte lea árbevirolaš máhtus sáhka, ja das leat guokte sáni biddjon oktii; árbi ja máhttu. Árbediehtu lea kollektiiva máhttu, mas gullá sihke praktihkalaš gealbbut ja teorehtalaš gelbbolašvuohta. Dan máhtu lea sámi álbmot ovddidan máŋggaid čuđiid jagiid badjel vai leat nagodan birget ekonomalaččat, sosiálalaččat ja dikšun dihte sin vuoiŋŋalašvuođa. Árbediehtu lea máhttu maid álkit heiveha ja man njálmmálaččat ja bargguid bokte leat fievrredan buolvvas bulvii.
«Árbediehtu» -prošeakta lea buvttaduvvon Deanu joatkkaskuvllas. Prošeavttas leat ráhkaduvvon sámegiel videot ja čájáhus mas leat govat oktan teavsttaiguin. Dat čájehuvvui gieskat Girkonjárggas, Grenselandsmuseas. Prošeaktakoordináhtorin lea leamašan Jorunn Eikjok. Son lea ovttasbargan govvejeddjiin Ola Røein, skuvlla bargiiguin ja sámi resursaolbmuiguin; Bertil Berg, Annbjørg Mudenia-Tran, Ottar Wigelius, Katinka Wigelius ja Mathis N. Eira.
Sámi álbmotbeaivvi rahpá Finnmárkkuopmodaga direktevra, Jan Olli čájáhusa diibmu 11.00 Porsáŋggu girjerádjosis. Čájáhusa lea rabas 06.02.-29.02.24.
