Dáhkádusmávssut buollimiid dihte Finnmárkkus lassánedje 39 proseanttain diibmá, čájehit Gjensidige logu.
Dáhkádusmávssut buollimiid dihte Finnmárkkus lassánedje 39 proseanttain diibmá, čájehit Gjensidige logu.
Oktiibuot dieđihuvvojedje dáhkádusfitnodagaide 256 unnibuš ja stuorát buollinvahágat Finnmárkkus. Leat 64 eanet go 2014 logut. Dáhkádusmávssut ledje 100 miljovnna ruvnno ovddas 2015:s, ja 2014:s 71 miljovnna ruvnno.
– Dehálaš doaibma vai unnidit buollimiid ja gádjut heakkaid lea iskat elrávdnjerusttega. Go dihtomielalaččat geavahivččii elrávdnjeapparáhtaid, de llivččii seastán olbmoheakkaid ja árvvuid, muitala Gjensidige diehtojuohkinjođiheaddji Pål Rune Eklo.
Dálvet lea stuorát buollinvárra
Sullii 50 proseantta buot buollimiin Norggas lea dan dihte go lea boasttuvuohta elrávdnjerusttegis. Dálvet lea buollinvárra alimus go elrávdnjerusttegiid geavaha eanet go geasset.
– Stuorimus buollimat dáhpáhuvvet dálvet. Addá oadjebasvuođa go elrávdnjerusttet lea ortnegis ja addá maid haddevuolideami dáhkádusas. Dainna sáhttá vuoitit, muitala Eklo.
Boares viesuin, main lea boaresmállet sikringskábe, fertejit vuoruhit divodit, ávžžuha Gjensidige. Ođđamállet rusttegiin sáhttet dattetge maid leat boasttuvuođat.
