-Almmuhus-
-Almmuhus-
-Almmuhus-
OĐĐASAT– Boraspiret eai váldde juovlaluomu

– Boraspiret eai váldde juovlaluomu

-

-

Boazodoalli lea eddon go Fylkkamánni ii vástit boraspire heahtetelefuvnna gosa galgá dieđihit oažžun dihte báhčinlobi boraspiriide mat vahágahttet.

Anna Lisa Båhl Basevuovddi orohagas Romssas lea juovlabasiid viggan oažžut oktavuođa Romssa Fylkkamánniin, geahččalan dihte oažžut báhčinlobi geatkái ja albasii mat leat speadjan sin ealus.

 

Gávdnan máŋga bohcco

Sii gávdne bealleheakkas bohcco juovlaruohta, ja Båhl vikkai riŋget Romssa Fylkkamánni heahtetelefuvdnii, mii lea dan várás ahte oažžut báhčinlobi boraspiriide mat vahágahttet, muhto ii ožžon vástádusa.

– Dat lea beare heittot, go heahtetelefuvnnas galggašii oažžut vástádusa go riŋge. Boraspiret gal eai váldde juovlaluoma, ja mii leat daid maŋemus beivviid gávdnan máŋga bohcco bealleheakkas maid boraspiret leat fallehan. Go de loahpas oaččuimet ságaide Fylkkamánni boraspireossodaga earáid bokte, de eat ožžon báhčinlobi, lohká son.

 

Fállojuvvon guođohanruhta

Orohahkii fállojuvvui baicca guođohanruhta, nu ahte sáhttet bidjat lassi guođoheddjiid gáhtten dihte boraspiriid goddimis eanet bohccuid.

– Dat ii leat min mielas dohkálaš, go mii eat sáhte váldit eará olbmuid guođohit geat eai dovdda guovllu. Dál leat hui rašes jieŋat guovllus, ja ferte dovdat guovllu jávrriid go doppe galgá vánddardit, lohká Båhl.

 

 

Rovdyra har ikke tatt juleferie, akuttkontakt, for skadefelling av rovvilt svarer ikke på telefonen. Denne video ble filmet i går av Ole Nils Aslak Baal

Posted by Anna Lisa Båhl on 25. desember 2015

 

Čájeha duohtavuođa

Båhl lohká sidjiide lea ahkidin gávdnat bealleheakkas bohccuid, ja son leage Facebookas juohkán filmma mas čájeha bealleheakkas bohcco maid geatki lea fallehan.

 – Ii leat leaika gávdnat bealleheakkas bohccuid ja vásihit dan biinnu, lohká son. Son muitala olbmot leat reageren go dákkár filmma lea juohkán.

– Muhtumiid mielas lea beare ilgat oaidnit diekkár filmmaid, muhto mun lean juohkán filmma danne go dat čájeha duohtavuođa, lohká Båhl.

 

Ollislaš árvvoštallan

Romssa Fylkkamánni boraspireossodaga gulahallanolmmoš Heidi Marie Greiner lohká sin heahtetelefuvdna doaibmá nu ahte jus ii leat olmmoš vávttas, de addojuvvo telefuvdnavástideaddji bokte mátketelefuvnna nummar, masa sáhttá riŋget. Son čilge manne eai leat addán geatkebáhčinlobi orohahkii.

– Mii leat ollislaččat árvvoštallan ahte orohat ii leat vel nu ollu vahágahttojuvvon ahte lea dárbu addit báhčinlobi geatkki báhčit. Dál álggos leat sii ožžon guođohandoarjjafálaldaga, lohká son.

 

Greiner čilge sii leat dáhtton orohaga doalahit oktavuođa singuin, geahčadan dihte movt ain ovdána boraspiredilálašvuohta ealu ektui.

 – Jus goddojuvvojit eanet bohccot, de mii dahkat ođđa árvvoštallama báhčinlobi ektui, lohká son.

 

Váidaga sádden

Båhl lohká sii leat váidán báhčinlobi biehttaleami Eanandoallodepartementii.

– Mii áigut dál čállit vuđoleappot váidaga, ja leat maid sádden filmma váidaga mielde. Dađi bahábut jáhkán eai mieđa dasa, ja orru nu ahte eai ane min maninge, lohká Båhl.

 

 

 

 

 

 

 

 

-Almmuhus-